ئاڤای خەڵک؛ تۆمارەکانی خانووبەرەی هەڵەبجە مەترسی لە ناوچوونیان لەسەرە

ئاڤا نیوز

بەڕێوەبەرایەتی تۆماری خانووبەرەی هەڵەبجە ڕووبەڕووی مەترسییەکی جددی بووەتەوە، بەهۆی ئەوەی بیناکەیان زۆر کۆن و خراپە و تۆمار و دۆسییەکانی هاووڵاتیان لە مەترسی سووتان یان لەناوچووندان.

لێدوانی فەرمی: عومەر مەحموود، بەڕێوەبەری تۆماری خانووبەرەی هەڵەبجە، بە ئاڤای ڕاگەیاند: "بیناکە موڵکی شارەوانییە و ئێمە کرێچین، تەنانەت بەو دۆخەشەوە سکاڵامان لەسەر تۆمارکراوە بۆ ئەوەی شوێنەکە چۆڵ بکەین."

لە وەرزی زستاندا ئاو دەچێتە ناو بیناکە و چەندین جار دۆسییەکان تەڕ بوون. هەروەها، بەهۆی کۆنیی بیناکەوە، چەند جارێک شۆرتی کارەبا ڕوویداوە و ئەگەر زوو فریا نەکەوتنایە، ئەگەری سووتان و لەناوچوونی زیاتر لە 50 هەزار دۆسیە و تۆماری خانووبەرە و زەوی و زاری هاووڵاتیان هەبوو، کە ئەمەش کێشەیەکی گەورەی بۆ خاوەندارێتی موڵک و ماڵی خەڵکی پارێزگاکە دروست دەکرد.

زانیاریی زیاتر: بەڕێوەبەری تۆماری خانووبەرەی هەڵەبجە ئەوەشی خستەڕوو: "ئێمە دەزانین شوێنەکەمان گونجاو نییە بۆ پاراستنی ئەم هەموو دۆسیەیەی خەڵک. زەویمان بۆ تەرخانکراوە، بەڵام پارە لەبەردەست نییە بۆ ئەوەی بیکەین بە بینا." داوای لە خێرخوازان و سەرمایەداران کرد کە لەسەر ئەو زەوییەی خۆیان بینایەکیان بۆ دروست بکەن تاوەکو ئەو فایلانەی خەڵک بپارێزرێن.

لەلایەکی دیکەوە: جگە لەم کێشانە، عومەر مەحموود باسی لەوەش کرد کە بەڕێوەبەرایەتییەکەیان پۆلیسێکی نییە بۆ پاراستنیان. "ڕۆژانە پارە لە هاووڵاتیان وەردەگرین و لەناو قاسە دایدەنێن، کەس نییە بیپارێزێت. چەند جارێکیش داوامان لە پارێزگا و قایمقامیەت کردووە، بەڵام داواکەیان بەهەند وەرنەگرتووە."