مەسرور بارزانی ڕەزامەندیی لەسەر نۆژەنكردنەوەی گۆڕستانی گەورەی شاری هەولێر دا

ئاڤا نیوز

سەرۆكوەزیران مەسرور بارزانی، ڕەزامەندی لەسەر نۆژەنكردنەوەی كۆنترین و ناودارترین گۆڕستانی شاری هەولێر دا و تێچووی نۆژەنكردنەوەكەش زیاتر لە 820 ملیۆن دینارە.

 

ڕاگەیێنراوی فەرمی: پارێزگای هەولێر بڵاوی كردەوە، له‌ ڕوانگه‌ی ئەوەی گۆڕستانی گەورە به‌شێكه‌ له‌ مێژووی دێرینی پایتەختی هەرێمی كوردستان، سەرۆكوەزیران مەسرور بارزانی ڕەزامەندیی دا لەسەر خەرجكردنی بڕی  820 ملیۆن و 709 هەزار دینار، بەشێوەی نەختینە لە سەر بودجەی پارێزگای هەولێر بۆ جێبەجێکردنی پڕۆژەی نۆژەنكردنەوەی گۆڕستانی گەورەی شاری هەولێر.

 

زانیاریی زیاتر: گۆڕستانی گەورەی شاری هەولێر، كە كەوتۆتە ناوجەرگەی بازاڕ و دامێنی قەڵات و تەنیشت بازاڕەكانی شێخەڵڵا و نیشتمان، بەیەکێك لە كۆنترین و ناودارترین گۆڕستانەكانی شاری هەولێر هەژمار دەکرێت و بووەتە بەشێك له‌ مێژووی دێرینی شارەكە.