گیانلەدەستدان و برینداربوونی کرێکار لەکاتی کارکردن لە ڕۆژهەڵاتی کوردستان زیادی کردووە

ئاڤا نیوز

 

بەپێی ئامارەکان، لە ماوەی شەش مانگی یەکەمی ئەمساڵدا لە پارێزگای کرماشانی ڕۆژهەڵاتی کوردستان، ڕێژەی گیانلەدەستدان و برینداربوونی کرێکاران لە کاتی کارکردندا بە شێوەیەکی بەرچاو زیادی کردووە. لەم ماوەیەدا 538 کرێکار بریندار بوون و 24 کرێکاری دیکەش گیانیان لەدەستداوە.

 

وێنە گەورەکە: دۆخی نالەباری ئابووری، ڕێژەی بەرزی بێکاری و کەمیی مووچە لە ئێران، بووەتە هۆی ئەوەی کە ژمارەیەکی زۆر لە هاوڵاتییان، تەنانەت دوای کارە فەرمییەکانیشیان، ڕوو لە کاری کرێکاریی سەخت و مەترسیدار بکەن. ئەمەش بووەتە هۆی بەرزبوونەوەی ئاماری ڕووداوەکانی کار بە بەراورد بە ساڵی ڕابردوو. بەپێی ئامارەکان، ڕووداوەکانی کار بە دووەم هۆکاری گیانلەدەستدان لە ئێراندا دادەنرێت، کە تەنها لە دوای ڕووداوەکانی هاتووچۆوە دێت.

 

لێدوانی فەرمی: بەهتاش خانی ئاباد، بەڕێوەبەری گشتیی پزیشکی دادوەریی کرماشان، ڕایگەیاند، لە شەش مانگی یەکەمی ئەمساڵدا 24 کرێکار (23 پیاو و 1 ژن) گیانیان لەدەستداوە. هاوکات 538 کرێکاری دیکە (522 پیاو و 16 ژن) بریندار بوون. ئەم ئامارە بەرزبوونەوەیەکی بەرچاو نیشان دەدات بە بەراورد بە ساڵی ڕابردوو کە کۆی گشتیی قوربانیان (گیانلەدەستدان و برینداربوون) 392 کەس بوو.

 

خانی ئاباد ئاماژەی بەوەش کردووە کە بەهۆی بێکارییەوە، ژنانیش ناچار بوون شانبەشانی پیاوان کاری کرێکاری بکەن، هەر بۆیە ناویان لە لیستی قوربانیاندا دەبینرێت.

 

ئەوەی پێویستە بیزانیت؛ زۆربەی حاڵەتەکانی گیانلەدەستدان و برینداربوون بەهۆی کەوتنەخوارەوە لە بەرزاییەوە ڕوویانداوە، کە ئەمەش دەگەڕێتەوە بۆ ناشارەزایی و نەبوونی ئەزموونی پێویستی کرێکاران.

هاوکات؛ زۆرێک لە خاوەنکارەکان بۆ کەمکردنەوەی خەرجی، پابەندی ڕێنماییەکانی سەلامەتیی کار نابن و کرێکارەکانیان بیمە ناکەن. ئەمە جگە لە کەمیی پشکنەر و نەبوونی چاودێریی پێویست لەلایەن وەزارەتی کارەوە، بووەتە هۆی ئەوەی کە سەلامەتیی کرێکاران پشتگوێ بخرێت.

بەپێی دوایین ئاماری ڕێکخراوی کاری جیهانی (ILO)، ئێران لە ڕووی سەلامەتیی شوێنی کارەوە لە پلەی 102ی جیهاندایە لەنێوان 189 وڵاتدا، کە ئەمەش وایکردووە ببێتە یەکێک لە وڵاتە هەرە مەترسیدارەکان بۆ کرێکاران.