کۆمیسیۆن تۆماری دەنگدەرانی کەرکووکی پەسەند کرد

ئاڤا نیوز

 

کۆمیسیۆنی باڵای سەربەخۆی هەڵبژاردنەکان، بڕیاری کۆتایی لەسەر ئەو تانانە دا کە لەسەر تۆماری دەنگدەرانی پارێزگای کەرکووک تۆمارکرابوون و بە فەرمی تۆمارە نوێکراوەکەی پەسەند کرد.

 

ئەو مانایەی دەیگەیێنێت؛ بەم بڕیارە، هەڵبژاردنی ئەنجوومەنی نوێنەران کە بڕیارە لە 2025-11-11، بکرێت، لە کەرکووکیش وەک پارێزگاکانی دیکه بە شێوەیەکی ئاسایی بەڕێوەدەچێت.

 

بڵاوکراوەی فەرمی: ئەنجوومەنی کۆمیسیاران لە کۆبوونەوەیەکی تایبەتدا، تاوتوێی یاداشتی لیژنەی وردبینیی تۆماری دەنگدەرانی کەرکووکی کرد، بە ناونیشانی "ڕاپۆرتی کۆتایی لیژنەی وردبینیی تۆماری دەنگدەرانی کەرکووک". دوای گفتوگۆ و ڕاوێژ لەنێوان ئەنداماندا، بڕیار درا بە پەسەندکردنی تۆمارەکە.

 

زانیاریی زیاتر: بەپێی بڕیارەکە، تۆماری نوێکراوەی دەنگدەرانی پارێزگای کەرکووک پەسەند کرا تا لەسەر بنەمای ئەو تۆمارە هەڵبژاردنی ئەنجوومەنی نوێنەران لە مانگی داهاتوودا ئەنجام بدرێت. هاوکات جەخت لەسەر جێبەجێکردنی ئەو ڕاسپاردە پێشنیازکراوانە کرایەوە کە بۆ پەرەپێدانی پرۆسەی وردبینی لە داهاتوودا گرنگن.

 

لەهەمان کاتدا: کۆمیسیۆن دڵنیایی دەدات کە هەموو ڕێوشوێنە پێویستەکانی گرتووەتەبەر بۆ دڵنیابوون لە پاکی و بێگەردیی پرۆسەی هەڵبژاردن لە سەرجەم پارێزگاکان، بە کەرکووکیشەوە.