هەسەدە و هاوپەیمانان سەرکردەیەکی دیاری داعش دەستگیر دەکەن

ئاڤا نیوز

هێزەکانی سووریای دیموکرات (هەسەدە) لە ئۆپەراسیۆنێکی ئەمنیدا لە گوندەوارەکانی ڕۆژهەڵاتی حەلەب، بە پشتیووانی هاوپەیمانیی نێودەوڵەتی، یەکێک لە دیارترین سەرکردەکانی ڕێکخراوی داعشیان دەستگیر کرد.

 

ڕاگەیێنراوی فەرمی: بەگوێرەی ڕاگەیێنراوی هەسەدە، "تیمەکانی ئۆپەراسیۆنە تایبەتەکانی سەر بە هێزەکانیان، بە پشتیوانیی ڕاستەوخۆی هێزەکانی هاوپەیمانیی نێودەوڵەتی، دوێنێ چوارشەممە ئۆپەراسیۆنێکی ئەمنی وردیان لە شارۆچکەی مەسکەنە لە ڕۆژهەڵاتی شاری حەلەب ئەنجام دا. لە ئاکامدا، تیرۆریست ئەحمەد خەڵەف حوسێن، یەکێک لە دیارترین سەرکردەکانی ڕێکخراوی داعش لە ناوچەکە، دەستگیر کرا."

 

زانیاریی زیاتر: هەسەدە ئاماژەی بەوەشداوە کە ئۆپەراسیۆنەکە دوای چاودێری و بەدواداچوونی وردی هەواڵگری بۆ جووڵەکانی ئەو تیرۆریستە هاتووە، هێزەکان توانیویانە بە بێ هیچ زیانێک هێرش بکەنە سەر شوێنی خۆحەشاردانی و دەستگیری بکەن.

 

لەهەمان کاتدا: بەگوێرەی ڕاگەیێنراوەکەی هەسەدە، لێکۆڵینەوە سەرەتاییەکان ئاشکرایان کردووە کە ئەو دەستگیرکراوە، سەرۆکایەتیی شانەیەکی کردووە کە کاری دابینکردنی کەلوپەل و ماددە پێویستەکانی دروستکردنی ئۆتۆمبێلی بۆمبڕێژکراو بووە بە ئامانجی ئەنجامدانی هێرشی تیرۆریستی دژ بە هاووڵاتیانی مەدەنی و هێزە ئەمنییەکان لە باکوور و ڕۆژهەڵاتی سووریا.