فەرەنسا بڕیارێکی نوێ بۆ دەستگیرکردنی بەشار ئەسەد بە تۆمەتی تاوانی جەنگ دەردەکات

ئاڤا نیوز

دەسەڵاتی دادوەری فەرەنسا بڕیارێکی نوێی نێودەوڵەتی بۆ دەستگیرکردنی بەشار ئەسەد، سەرۆکی پێشووی سووریا، بە تۆمەتی هاوکاریکردن لە ئەنجامدانی تاوان دژی مرۆڤایەتی و تاوانی جەنگ، بەهۆی هێرشە کیمیاییەکانی ساڵی 2013 لە سووریا دەرکرد.

بڵاوکراوەی فەرمی: سەرچاوەیەکی دادوەری بە ئاژانسی "فرانس پرێس"ـی ڕاگەیاندووە، دەسەڵاتی دادوەری فەرەنسا بڕیارێکی نوێی نێودەوڵەتی بۆ دەستگیرکردنی بەشار ئەسەد دەرکردووە، بە تۆمەتی ئەنجامدانی هێرشی کیمیایی لە ساڵی 2013.

زانیاریی زیاتر: بڕیارە نوێیەکە، ئەسەد تۆمەتبار دەکات بە تێوەگلان لە هێرشە کیمیاییەکاندا کە لە عەدرا و دوما لە 5ـی ئابی 2013 ئەنجامدران و نزیکەی 450 کەسی بریندار کرد، هەروەها لە غۆتەی ڕۆژهەڵات لە 21ـی ئابی هەمان ساڵدا، کە بەپێی ڕاپۆرتی هەواڵگریی ئەمریکا، بووە هۆی کوشتنی زیاتر لە هەزار کەس بە گازی سارین.

ئەوەی پێویستە بیزانیت: ئەمە سێیەمین بڕیاری دەستگیرکردنە کە دەسەڵاتی دادوەری فەرەنسا لە دژی ئەسەد دەریدەکات کە لە ئێستا لە ڕووسیا دەژی. لە 20ـی کانوونی دووەمی 2025، بڕیارێکی دەستگیرکردن دەرچوو بە تۆمەتی هاوکاریکردن لە تاوانی جەنگ بەهۆی بۆردوومانکردنی ناوچەیەکی نیشتەجێبوون لە دەرعا لە ساڵی 2017. هەروەها، بڕیارێکی دیکەی دەستگیرکردن لە 19ـی ئاب دەرچووبوو، کە ئەسەدی تۆمەتبار دەکرد بە هاوکاریکردن لە ئەنجامدانی تاوانی جەنگ و تاوان دژی مرۆڤایەتی، بەهۆی بۆردوومانکردنی سەنتەری ڕۆژنامەنووسان لە شاری حومس لە ساڵی 2012، کە بووە هۆی کوژرانی ڕۆژنامەنووسی ئەمریکی ماری کۆڵڤین و وێنەگری فەرەنسی، ڕیمی ئۆشلیک.