سەربەست لەزگین: پارتی نایەوێت پێكهێنانی كابینەی نوێ و پۆستەكانی بەغدا بكرێتە یەك پاكێج

ئاڤا نیوز

بەرپرسی مەكتەبی ڕێكخستنی پارتی دیموكراتی كوردستان لە پارێزگای دهۆك ڕایدەگەیەنێت، پارتی نایەوێت پرسی پێكهێنانی كابینەی نوێی حكومەتی هەرێمی كوردستان و پۆستەكانی بەغدا، بە یەك پاكێج بێت، بەو پێیەی هەڵبژاردنی پەرلەمانی كوردستان جیاوازی هەیە لەگەڵ هەڵبژاردنی ئەنجوومەنی نوێنەرانی عێراق و تایبەتمەندییان جیاوازە.

وێنە گەورەكە: زیاتر لە ساڵێك بەسەر بەڕێوەچوونی هەڵبژاردنی پەرلەمانی كوردستان تێپەڕدەبێت و تا ئێستا كابینەی نوێی حكومەتی هەرێمی كوردستان پێكنەهێنراوە. پارتی و یەكێتی وەك براوەی یەكەم و دووەمی هەڵبژاردنەكە، دەیان كۆبوونەوە و دانوستانیان كردووە و تا ئێستا نەگەیشتوونەتە ڕێككەوتنی كۆتایی.

لێدوانی فەرمی: سەربەست لەزگین، بەرپرسی مەكتەبی ڕێكخستنی پارتی دیموكراتی كوردستان لە پارێزگای دهۆك، لە هەڤپەیڤێنێكی تایبەتی ئاڤا میدیا ڕایگەیاند، ئێمە وەكو پارتی هەموو پەرۆشی و هەوڵێكمان بۆ ئەوە بوو؛ پێش هەڵبژاردنی پەرلەمانی عێراق حكومەت پێكبهێنرێت، بەڵام یەكێتی لە ئاست ئەو پەرۆشییە نییە و زۆر زیاتر لە پێگە و دەنگەكانی خۆی، داوای پۆستی حكومی لە كابینەی نوێدا دەكات.

سەربەست لەزگین وتیشی، بە یەكێتییمان ڕاگەیاندووە، ئەگەر بەهەمان پەنجا بە پەنجای ساڵانی پێشوو پۆستەكان دابەش بكرێن، كەواتە بۆچی هەڵبژاردن لە كوردستان دەكرێت، پێویستە ڕێز لە بڕیاری خەڵكی كوردستان بگرین كە دەنگەكانی پارتی بەڕێژەیەكی زۆر پێش دەنگەكانی یەكێتی كەوتووە.

زانیاریی زیاتر: بەگوتەی سەربەست لەزگین، پارتی نایەوێت پرسی پێكهێنانی كابینەی نوێی حكومەتی هەرێمی كوردستان و پۆستەكانی بەغدا، بە یەك پاكێج لەگەڵ یەكێتی بەیەكەوە ببەستێتەوە، بەو پێیەی دوو هەڵبژاردنی جیاوازن، وتیشی دوای هەڵبژاردنی پەرلەمانی عێراق، بەپێی بارودۆخی نوێ، قسەیەكی دیكەمان دەبێت.