ئومێد خۆشناو: شەقامی فیدڕاڵیی کۆیە لەسەر بودجەی پارێزگای هەولێر جێبەجێکراوە

ئاڤا نیوز

ئومید خۆشناو، پارێزگاری هەولێر لەبارەی کردنەوەی شەقامی فیدڕاڵیی کۆیە ڕوونکردنەوە دەدات و دەڵێت: "پڕۆسەکە بە حیزبی کراوە".

چیرۆکی سەرەکی: ڕۆژی پێنجشەممە 23-10-2025، قوباد تاڵەبانی، جێگری سەرۆکوەزیرانی کوردستان شەقامی 40 مەتریی فیدڕاڵی لە کۆیە کردەوە، دواتریش میدیاکانی یەکێتیی وا بڵاویانکردەوە کە دەستکەوتی حیزبەکەیانە و بە هەوڵی ئەوان تەواوکراوە. 

لێدوانی فەرمی: ئومێد خۆشناو، پارێزگاری هەولێر لە کۆنگرەیەکی ڕۆژنامەوانیدا ڕایگەیاند: پڕۆسەی کردنەوەی شەقامی فیدڕاڵ لە شاری کۆیە بە حیزبی کراوە، ئێمە وەکو پارێزگا لە کردنەوەی شەقامەکەدا ئاگادار نەکراوینەتەوە، میدیاکانی سەر بە یەکێتیش وایان بڵاوکردووەتەوە کە پڕۆژەکە لەسەر ئەرکی ئیدارەی گشتیی یەکێتیی جیبەجێ کراوە، بەڵام ئەمە دوورە لە ڕاستییەوە. 

زانیاریی زیاتر: بە گوتەی ئومێد خۆسناو، ئەو پرۆژەیە لەسەر بودجەی پارێزگای هەولێر و حکومەتی هەرێمی کوردستان دروست کراوە، کاتیک لە 19-4-2022 سەردانی کۆیەیان کردووە، خەڵکی ناوچەکە داوای تەواوبوونی پڕۆژەکەیان لێ کردووە، هەمان شەو داواکەیان گەیاندووەتە سەرۆکوەزیران مەسرور بارزانی و ئەویش ڕەزامەندیی لەسەر جێبەجێکردنی پرۆژەکە داوە. 

- هەر لە سەرەتاوە قوباد تاڵەبانی، نیازی ئەوەی هەبووە پڕۆژەکە لەلایەن کۆمپانیایەکی حیزبییەوە جێبەجێ بکرێت، ئێمەش تەواوکردنی شەقامەکە و خزمەتکردنی خەڵکی ناوچەکەمان مەبەست بووە. 

باکگراوند: شەقامی فیدڕاڵی لە ساڵی 2013 بەردی بناغەی دانراوە، پرۆژەکە لەلایەن چەند کۆمپانیایەکەوە دەستاودەستی پێوە کراوە و تەواو نەکرا، دوایین جار کۆمپانیایەک ئەرکی تەواوکردنی پرۆژەکەی لە ئەستۆ گرت و ئەمرۆ کرایەوە. شەقامەکە سەرەتا بە ناوی "مام جەلال"ـەوە بوو، دواتر ناوەکەی گۆڕدرا بۆ شەقامی فیدڕاڵی.