پووتین بۆ ئۆکراینا: وەڵاممان زۆر یەکلاکەرەوە و سەرسوڕهێنەر دەبێت

ئاڤا نیوز

لەکاتێکدا ئۆکراینا لە دانوستان دایە بۆ وەرگرتنی مووشەکی تۆماهۆک لە وڵاتانی ئەوروپا بۆ هێرشکردنە سەر ڕووسیا، ڤلادیمێر پووتین بە زمانێکی زۆر هەڕەشە ئامێز دەڵێت: وەڵاممان زۆر یەکلاکەرەوە و سەرسوڕهێنەر" دەبێت.


چیرۆکی سەرەکی: دوای ئەوەی کیێڤ ڕاوێژی بە وڵاتانی ئەوروپا کردووە  بۆ وەرگرتنی مووشەکی دوورهاوێژ و بەکارهێنانی دژی ڕووسیا، ڤلادیمێر پووتین، سەرۆکی ڕووسیا هۆشداریی تووند لەبارەیەوە دەدات.

لێدوانی فەرمی: پووتین لە لێدوانێکی ڕۆژنامەوانی ڕایگەیاند: گەر کیێڤ بە چەکی دوورهاوێژ هێرش بکاتە سەر مۆسکۆ، ئەوا وەڵامێکی زۆر بەهێزمان دەبێت، پێش ئەوەی بڕیارێکی لەوشێوەیە بدرێت دەبێت دەرئەنجامەکەشی لەبەرچاو بگرێت. 

- گفتوگۆی ناردنی تۆماهۆک بۆ ئۆکراینا و بەکارهێنانی لە دژی ڕووسیا هەوڵێکە بۆ خراپترکردنی دۆخەکە. 

لەلایەکی دیکەوە: ڤۆلۆدیمێر زێلێنسکی، سەرۆکی ئۆکراینا ڕایگەیاند: سەرۆکی ئەمریکا ڕەتیکردەوە کە مووشەکی دوورهاوێژ بۆ کیێڤ دابین بکات، هەربۆیە ئێستا دانوستان و گفتوگۆمان دەستپێکردووە لەگەڵ ئەوروپا بۆ دابینکردنی ئەو چەکە. 

لە کۆبوونەوەی ڕۆژی پێنجشەممەشی لەگەڵ ئەنجوومەنی ئەوروپا ڕایگەیاند: تەنها ئەمریکا ئەو چەکەی نییە، هەر بۆیە لەگەڵ هاوبەشە ئەوروپییەکانمان لە گفتوگۆداین بۆ دەستبەرکردنی. 

پەوەست بەم بابەتەوە: جەی دی ڤانس، جێگری سەرۆکی ئەمریکا ڕایگەیاند: ترەمپ تاوەکو ئێستا بڕیاری کۆتایی لەوبارەیەوە نەداوە، ئیدارەکەی نایەوێت دۆخی ئۆکراینا بەرەو ئاڵۆزی زیاتر بچێت، هەربۆیە لە هەوڵی درێژخایەنین بۆ چارەسەری ئەو دۆخە.