كۆلێژی تەكنیكی كفری بۆ یەكەمجار شێوازی وانەوتنەوە لە دوو زانكۆی جیاواز پەیڕەو دەكات

ئاڤا نیوز

كۆلێژی تەكنیكی كفری بۆ یەكەمجار شێوازی وانەوتنەوە لە دوو كەمپی زانكۆیی جیاواز پەیڕەو دەكات؛ قوتابیانی بەشی شیكاری خۆراك و تەندروستی، چەند وانەیەكیان بەشێوەی تیۆری و پراكتیكی لە كۆلێژی تەكنیكی هەڵەبجە خوێند.

چیرۆكی سەرەكی: لەچوارچێوەی جێبەجێكردنی میكانیزمی بۆلۆنیا پرۆسێس، كۆلێژی تەكنیكی كفری لە ئیدارەی گەرمیان، بۆ یەكەمجار شێوازی وانەوتنەوە لە دوو كەمپی زانكۆیی جیاواز پەیڕەو كرد، قوتابیانی بەشی شیكاری خۆراك و تەندروستیی كۆلێژەكە، چەند وانەیەكی بابەتی كیمیا و شیكاری خۆراكیان لە كۆلێژی تەكنیكی هەڵەبجە خوێند.

لێدوانی فەرمی: سامان كەریم، مامۆستای زانكۆ و یاریدەدەری ڕاگری كۆلێژی تەكنیكی كفری تایبەت بە ئاڤا ڕایگەیاند، یەكێك لە میكانیزمەكانی سیستمی بۆلۆنیا پرۆسێس ئەوەیە؛ قوتابیانی كۆلێژێك بچنە شوێنێكی دیكە و لە كۆلێژێكی هاوشێوە وانەكان بخوێنن، جا ئاڵوگۆڕەكە لەنێوان كۆلێژ و زانكۆكانی ناوخۆی هەرێمی كوردستان بێت یاخود دەرەوەی هەرێمی كوردستان بێت، ئێمەش لەو چوارچێوەیەدا بەباشمان زانی قوتابیانمان ئەزموونێكی نوێ تاقی بكەنەوە و وانەكانی بەشی شیكاری خۆراك و تەندروستی، كە ئەم بەشە تازە لە كۆلێژەكەمان كراوەتەوە، لە كۆلێژی تەكنیكی هەڵەبجە بخوێنن.

یاریدەدەری ڕاگری كۆلێژی تەكنیكی كفری ئاماژەی بەوەشكرد، لە ئاییندە بەردەوامی بەم ئەزموونە دەدەین لەپێناو بەرزكردنەوەی توانای قوتابیانمان و سوودوەرگرتن لە ئەزموونی كۆلێژ و زانكۆكانی دیكەی هەرێمی كوردستان، پلانمان هەیە ئەو ئەزموونە لەگەڵ زانكۆی سلێمانیش ئاڵوگۆڕ بكەین.

ئەوەشی باسكرد كە دەرگای كۆلێژەكەیان كراوەتەوە بۆ هەر بەشێك لە زانكۆكانی كوردستان كە بێن سەردانیان بكەن و ئاڵوگۆڕی زانستی بۆ بەرزكردنەوەی توانای قوتابیان پەیڕەو بكەن.

زانیاریی زیاتر: قوتابیانی قۆناغی دووەمی كۆلێژی تەكنیكی كفری، بەشێوەی تیۆری و پراكتیكی، وانەیەكیان بەناونیشانی (ڕۆڵ و بەکارهێنانی دژەئۆکسێنەرە سرووشتیەکان) لە كۆلێژی تەكنیكی هەڵەبجە وەرگرت و لە ئاییندەشدا ئەمشێوازی وانەوتنەوەیە لە كۆلێژەكەدا بەردەوام دەبێت و پەرەی پێ دەدرێت.