لە سلێمانی ئۆتۆمبێلێک خۆی کێشا بە ماتۆڕێکی سێ تایە و خێزانێکی حەوت کەسی کردە قوربانی

ئاڤا نیوز

ئێوارەی ئەمڕۆ هەینی لە فولکەی مامەڕیشە ئۆتۆمبێلێک خۆی کێشا بە ماتۆڕێکی سێ تایە کە خێزانێکی حەوت کەسی هەڵگرتبووە، کەسێک گیانی لە دەستدا و ئەوانی دیکەش بریندارن.

زانیاریی پەیامنێر: ژیوار عەبدولڕەحمان، پەیامنێری ئاڤا لە سلێمانی لەبارەی ڕووداوەکە دەڵێت: ئۆتۆمبێلێکی جۆری ڕەنجڕۆڤەر لە نزیک فولکەی مامەڕیشە خۆی کێشاوە بە ماتۆڕێکی سێ تایە کە خێزانێکی حەوت کەسی هەڵگرتبوو. ئەو کەسەی گیانی لەدەستداوە تەمەنی 25 بۆ 30 ساڵ دەبێت، خێزانەکە منداڵی تەمەن هەشت مانگیان لەگەڵ بووە، یەکێکی دیکە لە منداڵەکان تەمەنی دوو ساڵ بووە. سەرجەمیان بریندارن. شۆفێری ئۆتۆمبێلەکەش سەلامەتە.

لێدوانی فەرمی: سامان نادر، بەڕێوەبەری سەنتەری فریاکەوتنی خێرای سلێمانی بە ئاڤا میدیای وت، خێزانەکە حەوت کەسن، یەکێکیان گیانی لە دەستداوە، جگە لە دایک و باوکەکە چواری دیکەیان منداڵن و گەیێنراونەتە بەشی فریاکەوتنی نەخۆشخانەی شار.  

زانیاریی زیاتر: بەگوێرەی گوتەی سامان نادر، برینی هەر شەش کەسەکەی تر جێگرن و مەترسی لەسەر ژیانیان نەماوە.