نێردەی پووتین: کۆبوونەوەی لووتکەی پووتین و ترەمپ بەڕێوەدەچێت بەڵام لە کاتێکی دیکە

ئاڤا نیوز

دوای ئەوەی ترەمپ کۆبوونەوە چاوەڕوانکراوەکەی لەگەڵ پووتین هەڵوەشاندەوە، کیریل دیمیتریڤ، نێردەی تایبەتی پووتین ئاشکرای دەکات، "دەکرێت کۆبوونەوەکە لە کاتێکی دیکەدا ئەنجام بدرێت".

 

چیڕۆکی سەرەکی: دۆناڵد ترەمپ، سەرۆکی ئەمریکا ئارەزووی خۆی بۆ ئەنجامدانی دووەم لووتکە لەگەڵ ڤلادیمێر پووتین هاوتا ڕووسییەکەی دەربڕی، بریار بوو بەمزووانە لە بوداپێست کۆببنەوە، بەڵام بەڕێوەچوونی ئەم لووتکەیە ڕووبەڕووی ئاستەنگ بووەیەوە.

 

دواجار ترەمپ وتی "هەستم نەدەکرد دەگەینە ئەو شوێنەی کە دەبێت بیگەین، بۆیە کۆبوونەوەکەم لەگەڵ پووتین هەڵوەشاندەوە، بەڵام لە داهاتوودا ئەنجامی دەدەین".

 

لێدوانی فەرمی: کیریل دیمیتریڤ، نێردەی تایبەتی ڤلادیمێر پووتین، سەرۆکی ڕووسیا بۆ وەبەرهێنان و هاوکاریی ئابووری ڕایگەیاند، کۆبوونەوەی نێوان پووتین و دۆناڵد ترەمپ بەڕێوەدەچێت، بەڵام "ڕەنگە لە وادەیەکی تردا بکرێت.

 

هاوکات؛ دەشڵێت، "ئەمریکا، ئۆکراینا و ڕووسیا لە چارەسەرێکی دیپلۆماسی نزیک بوونەتەوە بۆ کۆتاییهێنان بەو ململانێیەی کە زیاتر لە سێ ساڵە بەردەوامە''.