لێدوانی نێچیرڤان بارزانی سەبارەت بە کێشەی مووچە

ئاڤا نیوز

نێچیرڤان بارزانی، جێگری سەرۆکی پارتی دیموکراتی کوردستان دووپاتی کردەوە چارەسەر کردنی مووچە لە پێشینەی کارەکانی حکومەتی هەرێمی کوردستانە و بە جێبەجێکردنی دەستوور، پرسی مووچە و کێشەکانی دیکەی نێوان هەرێمی کوردستان و عێراقی فیدراڵ چارەسەر دەکرێن.

چیرۆکی سەرەکی: ئەمڕۆ شەممە 25-10-2025 بە ئامادەبوونی نێچیرڤان بارزانی، جێگری سەرۆکی پارتی، کەرنەڤاڵی بانگەشەی پارتی دیموکراتی کوردستان لە سنووری شێخان بەڕێوەچوو.

پەیامی فەرمی: نێچیرڤان بارزانی، جێگری سەرۆکی پارتی گوتی: ئەو سیستەمەی عێراق لە بەرامبەر هەرێمی کوردستان جێبەجێی دەکات تەواو ناوەندییە، کێشەی مووچە و پێشمەرگە و شایستە داراییەکان و ماددەی 140 و پڕچەککردنی پێشمەرگە بەهۆی جێبەجێ نەکردنی دەستوور دروست بوونە.

نێچیرڤان بارزانی گوتیشی، پرسی مووچە لە دەستوور دیاریکراوە و دەبێت مووچەی مووچەخۆرانی هەرێمی کوردستان وەک هەموو مووچەخۆرانی عێراق دابین بکرێت. لە پێشینەی کارەکانی حکومەتی هەرێمی کوردستان، چارەسەر کردنی کێشەی مووچەیە و لەو باوەڕەداین چارەسەر دەکرێت.

بەشێکی دیکە لە وتارەکەی نێچیرڤان بارزانی:

٠ سوپاسی هەموو گەلی کورد دەکەم، کە سەرەڕای هەموو گوشار و ئاستەنگ و ناخۆشییەکان، جارێکی دیکە بۆ دۆست و دوژمن دووپاتیان کردەوە، بە دڵ لەگەڵ کوردستان دەمێننەوە و لەگەڵ پارتی دەمێننەوە و حیزبی خۆیان سەرفراز دەکەن.

٠ لە پێشینەی کارەکانی حکومەتی هەرێمی کوردستان پرسی ژیان و گوزەرانی خەڵکی کوردستانە، پەنا بەخوا ئەو کێشەیە چارەسەر دەبێت و کوردستان لەو قۆناغەوە دەبەینە قۆناغێکی گەشتر و ئاوەدانتر.

باکگراوند: هەردوو حکومەتی هەرێمی کوردستان و حکومەتی عێراق ڕێککەوتوون لەسەر هەناردەکردنەوەی نەوت و ڕادەستکردنی داهاتی ناوخۆی هەرێمی کوردستان و ڕەوانە کردنی مووچەی مووچەخۆرانی هەرێمی کوردستان، تا ئەو کاتەی ڕێککەوتن لەسەر بودجەی ساڵی داهاتووی عێراق دەکرێت.