گەڕەکێکی دیکە لە هەولێر دروست دەکرێت

ئاڤا نیوز

بە دەستپێکردنی گەیاندنی خزمەتگوزاری بۆ کەرتێکی دیکەی گەڕەسۆر، گەڕەکێکی دیکە لە هەولێر دروست دەکرێت.

چیرۆکی سەرەکی: زەوییەکانی گەڕەسۆر کەوتوونەتە سنووری شارەوانی بنەسڵاوە، بەشێکی گەڕەسۆر ئاوەدانکراوەتەوە و ژمارەیەک خزمەتگوزاریی بۆ دابین کراوە، ئاوەدانکردنەوەی بەشێکی دیکە ئەو کەرتە بە گەیاندنی خزمەتگوزاری دەستپێدەکات.

ئەوەی ئێستا ڕوودەدات: لەسەر بودجەی بەڕێوەبەرایەتی گشتیی شارەوانیەکان دیاریکردنی سەرەبلۆک و کردنەوەی شەقامەکان و تێکەڵەڕێژکردنی بەشێکی دیکەی زەوییەکانی گەڕەسۆر دەستیپێکرد.

لێدوانی فەرمی: ئومێد خۆشناو، پارێزگاری هەولێر گوتی، دانانی سەرەبلۆک و کردنەوەی شەقام و تێکەڵڕێژکردن بۆ نزیکەی سێ هەزار پارچە زەوی گەڕەسۆر کرا، بەمەش خاوەنەکانیان سوودمەند دەبن لە نرخی زەوییەکانیان و ئاوەدان کردنەوەی ئەو گەڕەکە.

هەنگاوی داهاتوو: کۆگایەکی ئاوی پڕۆژەی فریاگوزاریی خێرای ئاوی هەولێر لەو گەڕەکە دروست دەکرێت، لە رێگەیەوە ئاو بە ئەو زەوییانە دابین دەکرێت.

بۆچی گرنگە: بە گەیاندنی ئەو خزمەتگوزارییانە، ئاوەدانکردنەوەی گەڕەکەکە هەنگاوێکی دیکە دەچێتە پێشەوە و نزیکەی سێ هەزار کەس لە خاوەنەکانی ئەو زەویانە لێی سوودمەند دەبن.