یانەی ئامەد سپۆر درێسێک پێشکەش بە ئیسماعیل بێشکچی دەکات

ئاڤا نیوز

نزیکەی مانگێکە ئیسماعیل بێشکچی لە نەخۆشخانەیە و شاندێکی یانەی ئامەد سپۆر سەردانی دەکات و درێسێکی یانەکەی پێ دەبەخشێت.

چیرۆکی سەرەکی: ئێوارەی ڕۆژی شەممە 27-9-2025، لە کاتی بەڕێوەچوونی نۆیەمین فێستیڤاڵی بەڵگە فیلم لە ئامەد، د. ئیسماعیل بێشکچی، نووسەر و کۆمەڵناسی تورک و دۆستی کورد دووچاری جەڵتەی مێشک بوو، بە هۆیەوە گەیێنرایە نەخۆشخانە.

بڵاوکراوەی فەرمی: یانەی ئامەد سپۆر لە پلاتفۆرمەکانی خۆی بڵاویکردووەتەوە، سەردانی ئیسماعیل بێشکچیان کردووە لە نەخۆشخانەی کۆلیژی پزیشکی دیجلە لە ئامەد، لە سەردانەکەیاندا درێسی ژمارە 21 کە لە سەری نووسراوە ئیسماعیل بێشکچی، وەک دیاری و پاڵپشتیی پێشکەش بە بێشكچی دەکەن.

ئەمەش بزانە: کاتێک ئیسماعیل بێشکچی گەیێنرایە نەخۆشخانە، سەرۆکوەزیران مەسرور بارزانی، لە پەیوەندییەکی تەلەفۆنیدا لەگەڵ وەقفی ئیسماعیل بێشکچی، هیوای زوو چاکبوونەوەی بۆ بێشکچی خواست و ئامادەیی هەموو هاوکارییەکی بۆ چارەسەرکردنی دەربڕی.

باکگراوند: ئیسماعیل بێشكچی، نووسەر و كۆمەڵناس لە 7-1-1939 لە پارێزگای چۆڕووم لە دایکبووە. دەرچووی كۆلێژی زانستە سیاسییەكانە لە زانكۆی ئەنقەرە و لە ساڵی 1965دا دكتۆرای لە بواری كۆمەڵایەتیی بەناونیشانی "گۆڕانكاری لە رۆژهەڵات و كێشە بنیاتنەرەكان و كۆچی هۆزەكان" بەدەست هێنا. لە ساڵی 1970 دكتۆراكەی لێ سەنرایەوە و لە ساڵی 1971 لە ئامەد بۆ ماوەی 17 ساڵ و دوو مانگ زیندانی کرا.