ئاڤای خەڵک؛ دوو گەڕەکی خورماڵ کێشەی نەبوونی خزمەتگوزارییان هەیە

ئاڤا نیوز

دوو گەڕەکی قەزای خورماڵ، "داڵانی" و "ئاشتی"، ڕووبەڕووی کێشەی خزمەتگوزاری بوونەتەوە، کە بووەتە هۆی ناڕەزایەتی دانیشتووان و نیگەرانییان لەبارەی تەواونەبوونی پڕۆژەکان و بێبەشبوونیان لە مافە سەرەتاییەکانیان.

چیرۆکی سەرەکی: لە گەڕەکی داڵانی، پڕۆژەی دروستکردنی شۆستە و قیرتاوکردنی سێ کۆڵان نزیکەی دوو مانگە دەستیپێکردووە، بەڵام خێرایی کارکردنەکەی جێگەی گلەیی دانیشتووانە.

زانیاریی بەدەستهاتوو: عەلی یونس، یەکێک لە دانیشتووانی گەڕەکەکە، بە ئاڤای ڕایگەیاند: "نزیک دەبینەوە لە وەرزی بارانبارین، ترسمان هەیە کارەکە تەواو نەبێت و بەزمی قوڕ و لیتە دەستپێبکات." داوا دەکات پڕۆژەکە بە زووترین کات تەواو بکرێت، چونکە تەپوتۆزێکی زۆر لە ئەنجامی کارکردنەکە دروست بووە و بووەتە هۆی بێزاری هاووڵاتیان.

سەبارەت بە گەڕەکی ئاشتی، دۆخێکی جیاوازی هەیە؛ لە کاتێکدا زۆربەی کۆڵانەکانی قیرتاو کراون، یەک کۆڵان بەجێهێڵدراوە.

ئانا زانا، دانیشتوویەکی ئەو گەڕەکەیە و خاوەن پێداویستی تایبەتە، بە ئاڤای گوت، "لەو هەموو کۆڵانە بۆ بەس ئەوەی ئێمە بەجێما، ناتوانم بە عەرەبانەکەمەوە تا سەر سووچی کۆڵانەکەمان بڕۆم ئەوەندە خراپە."

لێدوانی فەرمی: جەلال محەممەد، سەرۆکی شارەوانی خورماڵ، بە ئاڤای ڕاگەیاند، بۆ گەڕەکی داڵانی، شارەوانی چاودێری وردی پڕۆژەکە دەکات و هەندێک پێشهاتی چاوەڕواننەکراو بوونەتە هۆی دواکەوتن. ڕوونی کردەوە کە ئەم سێ کۆڵانە قۆناغی دووەمی پڕۆژەکەن و کۆمپانیاکەش سلفەی وەرنەگرتووە، بۆیە هەندێک "چاوپۆشی" لە کاتی تەواوبوونەکە کراوە. سەرۆکی شارەوانی دڵنیایی دا کە پێش وەرزی بارانبارین "تێکەڵەڕێژ" تەواو دەبێت، بەڵام قیرتاوکردنەکە دەکەوێتە دوای وەرزی بارانبارین.

بە داواکاریی گەڕەکی ئاشتیش، جەلال محەممەد وتی، دەرخستەیان بۆ قیرتاوکردنی کۆڵانەکە کردووە و ئێستا لە پارێزگای هەڵەبجەیە. هیوای خواست پڕۆژەکە لەو 25 ملیار دینارەی کە سەرۆکی حکومەت بۆ هەڵەبجەی تەرخان کردووە، جێبەجێ بکرێت.