ڕووسیا: لە کۆتاییهێنان بە جەنگی ئۆکراینا نزیکین

ئاڤا نیوز

نێردەی تایبەتی پووتین بە سەردانێک گەیشتووەتە واشنتن و لەگەڵ بەرپرسانی باڵای وڵاتەکە کۆبووەتەوە، ئاشکرای دەکات تەواو نزیکین لە دۆزینەوەی ڕێککەوتنێک بۆ وەستاندنی شەڕی ئۆکراینا.

چی ڕوودەدات: بڕیار وابوو لووتکەی دووەمی ترەمپ و پووتین لەم نزیکانە بەڕێوەبچێت کە ئامانج لێی دۆزینەوەی ڕێگە چارەیەک بوو بۆ شەڕی نێوان ڕووسیا و ئۆکراینا، بەڵام دوایین دواجار دۆناڵد ترەمپ، سەرۆکی ئەمریکا ئاشكرای کرد کە هیچ کۆبوونەوەیەک لەگەڵ پووتین ناکات.

لێدوانی فەرمی: کیریل دیمیتریڤ، نێردەی تایبەتی ڤلادیمێر پووتین، سەرۆکی ڕووسیا بۆ وەبەرهێنان و هاوکاریی ئابووری ڕایگەیاند، هەر یەکە لە ڕووسیا و ئەمریکا و ئۆکراینا لە کۆتاییهێنان بە جەنگ لە ڕێگەیەکی دیپلۆماسی نزیکین، هاوکات، ئاماژەی بەوە کرد کە ڤۆلۆدێمیر زێلینسکی، سەرۆکی ئۆکراینا دانی بە سنوورەکانی ئێستای جەنگەکەدا ناوە، چونکە ئەو پێشتر داوای کشانەوەی تەواوی ڕووسیای دەکرد، بۆیە ئەمەش هەنگاوێکی گرنگە لە چارەسەرێکی دیپلۆماسی بۆ کۆتاییهێنان بە جەنگ.

کاریگەری و لێکەوتەکان: هەفتەی ڕابردوو ئەمریکا سزای نوێ بەسەر ڕووسیادا سەپاند پەیوەست بەم پرسە، دیمتریێڤ ئاشكرای کرد، سەرباری ئەم کردەوەیەی واشنتن، گفتوگۆی نێوان ڕووسیا و ئەمریکا بەردەوام دەبێت. بەڵام ئەگەر بەرژەوەندییەکانی ڕووسیا لەبەرچاو نەگیرێت، ئەوا هیچ سوودێکی نابێت.