ئاکپارتی: کشانەوەی پەکەکە لە تورکیا لە بەرژەوەندیی پرۆسەی ئاشتیدایە

ئاڤا نیوز

 

گوتەبێژی ئاکپارتی ئاماژە بەوە دەدات بڕیاری پەکەکە بۆ کشاندنەوەی هێزەکانی لە تورکیا و باکووری کوردستان، دەبێتە هۆی بەرەوپێشتربردنی پرۆسەی ئاشتی و بە پێویستیشی دەزانێت پرۆسەی چەکدانان هەسەدەش بگرێتەوە.

 

چیرۆکی سەرەکی: دوای ئەوەی ئەمڕۆ یەکشەممە 26-10-2025 تەڤگەری ئازادیی کوردستان ڕایگەیاند، وەک بەدەمەوەهاتن بۆ بانگەوازەکەی ئۆجەلان و بڕیارەکانی کۆنگرەی 12ـی پەکەکە، بڕیاری داوە هێزەکانیان لە تورکیا و باکووری کوردستان بکێشننەوە، گوتەبێژی ئاکپارتی ڕایگەیاند ئەمە هەنگاوێکی گونجاوە بۆ گەیشتن بە ئامانجی سەرەکی کە سەرخستنی پرۆسەی ئاشتییە.

 

لێدوانی فەرمی: عومەر چەلیک، گوتەبێژی ئاکپارتی'ـی دەسەڵاتدار لە تورکیا ڕایگەیاند هەنگاوی نوێی توکیا بۆ پرۆسەی چەکدانان و بڕیاری پەکەکە بۆ کشانەوەی هێزەکانی لە تورکیا، هەنگاوی کردەییە بۆ بەرەوپێشچوونی نەخشەڕێگای پرۆسەکە. 

 

زانیاریی زیاتر؛ عومەر چەلیک باس لەوە دەکات چەکدانان و هەڵوەشاندنەوەی تەواوی ئەو گرووپانەی تورکیا پێی وایە بەشێکن لە پەکەکە لە تەواوی ناوچەکە بە سووریا و عێراق و ڕۆژئاوا و باشووری کوردستانەوە بەشێکن لە پرۆسەی ئاشتی.

 

سەرنجیش دەخاتە سەر ئەوەی بەرەوپێشچوونی پرۆسەی چەکدانان و خۆهەڵوەشاندنەوە چوارچێوەی کارکردنی کۆمیسیۆنە پەرلەمانییەکە ڕوونتر دەکات. 

 

ئەوەی پێویستە بیزانیت؛ گوتەبێژی ئاکپارتی جارێکی دیکە هۆشداری دەدات لە هەوڵەکان بۆ لەباربردنی پرۆسەکە و دەڵێت: ڕێگە بەوە نادەین بە دوورخستنەوە لە ئامانجی سەرەکی، تۆمەت هەڵبەستن و قسەی نابەجێ، هەوڵی ژەهراویکردنی پرۆسەکە بدرێت. 

 

لە لایەکی دیکەوە: لای خۆیشیەوە ئەفگان ئالا، جێگری سەرۆکی گشتیی ئاکپارتی ئەم بڕیارەی پەکەکە بە کردنەوەی دەرگاکان بە ڕووی قۆناغێکی نوێی پرۆسەی ئاشتی ناو دەبات و دەڵێت: بەلەبەرچاوگرتنی پێشهاتەکان جیهان و دەوروبەری تورکیا دەردەکەوێت پرۆسەی ئاشتی چەندە گرنگە.