سەرۆک بارزانی: پێویستە دەرئەنجامی هەڵبژاردن بکرێنە پێوەر بۆ پێکهێنانی حکومەتێکی فیدراڵیی بەهێز

ئاڤا نیوز

 

سەرۆک بارزانی لەکاتی کۆبوونەوەی لەگەڵ باڵیۆزی ڕووسیا لە عێراق ڕایگەیاند، "پێویستە دەرئەنجامەکانی هەڵبژاردن بکرێنە پێوەر بۆ پێکهێنانی حکومەتێکی فیدراڵیی بەهێز لەسەر بنەمای دەستووری هەمیشەیی عێراق و بە بەشداری هەموو پێکهاتە و لایەنە سیاسییەکان".

 

چیرۆکی سەرەکی؛ ئەمڕۆ یەکشەممە 26ـی تشرینی یەکەمی 2025 لە پیرمام، سەرۆك مەسعود بارزانی پێشوازی لە ئیلبروس کوتراشیڤ باڵیۆزی ڕووسیا لە عێراق کرد.

 

ڕاگەیێنراوی فەرمی؛ بەگوێرەی ڕاگەیێنراوی بارەگای بارزانی "لە دیدارەکەدا کە ماکسیم ڕۆبین، کونسوڵی گشتیی ڕووسیا لە هەولێر ئامادەی بوو، باس لە بارودۆخی سیاسیی و گۆڕانگاری و پێشهات و ئاڵنگارییەکان لە عێراق و ناوچەکە کرا.

 

باس لە پەیوەندییەکانی نێوان هەولێر و بەغدا و ڕێککەوتنی ئەم دواییەی نێوان هەردوولا لە بارەی هەناردەکردنەوەی نەوتی هەرێمی کوردستان کرا و درێژەدان و بەردەوامی پێشخستنی ئەم ڕێککەوتنە بە گرنگ زانرا.

 

لە بەشێکی دیکەی ئەم دیدارەدا گفتوگۆ لەبارەی هەڵبژاردنەکانی داهاتووی ئەنجوومەنی نوێنەرانی عێراق و دەرئەنجام و هەنگاوەکانی دوای ئەم پڕۆسەیە و لێکنزیکبوونەوەی لایەنە سیاسییەکانی عێراق کرا. 

ئەوەی پێویستە بیزانیت؛ لە ڕاگەیێنراوەکەی بارەگای بارزانیدا هاتووە، "سەرۆک بارزانی وێڕای دەربڕینی پاڵپشتی خۆی بۆ بەڕێوەچوونی هەڵبژاردن لە کەشێکی ئازاد و دیموکراسیدا، جەختی لەوە کردەوە کە پێویستە دەرئەنجامەکانی هەڵبژاردن بکرێنە پێوەر بۆ پێکهێنانی حکومەتێکی فیدڕاڵی بەهێز لەسەر بنەمای دەستووری هەمیشەیی عێراق و بە بەشداری هەموو پێکهاتە و لایەنە سیاسییەکان.

 

ئەمەش بزانە؛ پەیوەندییەکانی نێوان ڕووسیا لەگەڵ عێراق و هەرێمی کوردستان و پەرەپێدانی ئەو پەیوەندییانە بەشێکی دیکەی ئەم دیدارە بوون.