دوو پڕۆژەی گرنگی ئاودێری لە قەزای خورماڵ جێبەجێ دەكرێن

ئاڤا نیوز

زیاتر لە 621 ملیۆن دینار تەرخانكرا بۆ تەواوكردن و كۆنكرێتكردنی دوو پڕۆژەی ئاودێریی لە گوندی یاڵانپێ سەر بە قەزای خورماڵ و دەستكراوە بە جێبەجێكردنی پرۆژەكان.

چیرۆكی سەرەكی: لە چوارچێوەی بەدواداچوونی خودی سەرۆكوەزیران مەسرور بارزانی بۆ گرفت و داواكارییەكانی هاونیشتمانیانی پارێزگای هەڵەبجە، فەرمانگەی بەدواداچوونی پڕۆژەكان لە سەرۆكایەتی ئەنجوومەنی وەزیران، ڕەزامەندی دا لەسەر خەرجكردنی زیاتر لە 621 ملیۆن دینار بەشێوەی نەختینە و قۆناغ لەسەر بودجەی وەزارەتی كشتوكاڵ بۆ هەردوو پڕۆژەی ئاودێری و چاككردنەوە و كۆنكرێتكردنی جۆگەكانی قوڵەنگەچین و گەنەبۆ لە گوندی یاڵانپێ سەر بە قەزای خورماڵ.

لێدوانی فەرمی: د. كاروان سەباح هەورامی، بەڕێوەبەری گشتیی سەرچاوەكانی ئاو لە وەزارەتی كشتوكاڵ بە ئاڤای ڕاگەیاند، جێبەجێكردنی ئەم دوو پڕۆژەیە داواكاریی خەڵكی خورماڵ بوو لەكاتی سەردانەكەی سەرۆكوەزیران مەسرور بارزانی بۆ پارێزگای هەڵەبجە، كە هەر ئەوكات بەڵێنی پێدان سەرجەم داواكارییەكانیان جێبەجێ بكات.

زانیاریی زیاتر: گوژمەی زیاتر لە 305 ملیۆن دینار بۆ تەواوكردن و كۆنكرێتكردنی هەردوو جۆگەی قوڵەنگچین تەرخان دەكرێت، هاوكات بڕی 316 ملیۆن دیناریش بۆ جۆگەی گەنەبۆ تەرخان دەكرێت كە هەردوو پڕۆژەكە دەكەونە گوندی باڵانپێ لە قەزای خورماڵ.