زانیاریی ئاڤا؛ 35 کۆچبەری کورد لە لیبیا دەستگیر کران

ئاڤا نیوز

ئاڤا میدیا بەدواداچوون بۆ دەستگیرکردنی کۆچبەرانی کورد لە لیبیا دەکات و بەپێی زانیارییەکان 35 کۆچبەر دەستگیر کراون.

وێنە گەورەکە: لە ساڵی ڕابردوودا لیبیا بووە بە یەکێک لە ڕێڕەوە دیارەکانی گەیشتن بە وڵاتانی ئەوروپا بە ڕێگەی نایاسایی، بەشێک لە گەنجانی هەرێمی کوردستان و وڵاتانی دیکەی ناوچەکە، بۆ گەیشتن بە کەناراوەکانی ئیتاڵیا ڕێگای ئەو وڵاتە بەکاردەهێنن، ئەو گەنجانە لەلایەن هێزە ئەمنییەکان دەستگیر دەکرێن، ڕووبەڕووی دۆخی نەخوازراو و ئەشکەنجەدان، تەنانەت گیانلەدەستدانیش دەبنەوە.

زانیاریی بەدەستهاتوو: ئاڤا زانیویەتی لە ڕۆژانی ڕابردوودا 35 کۆچبەری کورد لە لیبیا دەستگیر کراون، کە 23 کەسیان لە کەناراوەکانی زاویە و 12 کەسیان لە بازگەکانی دەوروبەری تەرابلووس بوون.

لێدوانی فەرمی: ئەبوبەکر عەلی، سەرۆکی کۆمەڵەی پەنابەرە گەڕاوەکانی ئەوروپا بە ئاڤای گوت: تەنیا ئەمساڵ 319 کۆچبەری کورد لە لیبیا و 80 کۆچبەری دیکە لە تونس لەلایەن حکومەتی کوردستان گەڕێنراونەتەوە، دوو کۆچبەریش گیانیان لەدەست داوە.

ئەمەش بزانە: ڕۆژی یەکشەممە 26-10-2025، 40 هاونیشتمانی لە لیبیاوە گەڕێنرانەوە هەرێمی کوردستان کە هەوڵیان دابوو بگەنە ئیتالیا و ئەوروپا.