ئاڤا کورسییە تەرخانکراوەکانی پارێزگاکانی کوردستان بۆ هەڵبژاردنی پەرلەمانی عێراق ڕوون دەکاتەوە

ئاڤا نیوز

کێبڕکێی لایەنە سیاسییەکانی هەرێمی کوردستان بۆ بەدەستهێنانی کورسییەکانی پەرلەمانی عێراق تا دێت گەرمتر دەبێت، چ لەناو پارێزگاکانی هەرێمی کوردستان و چ لە ناوچە کوردستانییەکانی دەرەوەی هەرێمی کوردستان.

وێنە گەورەکە: بڕیارە 11ـی مانگی داهاتوو هەڵبژاردنی خولی شەشەمی پەرلەمانی عێراق بەڕێوەبچێت، لایەنە سیاسییە کوردییەکانیش چەندین کاندیدیان لە پارێزگاکانی هەرێمی کوردستان و ناوچە کوردستانییەکانی دەرەوەی هەرێمی کوردستان هەیە.

زانیاریی بەدەستهاتوو: بەپێی ئامارەکانی کۆمیسیۆنی باڵای هەڵبژاردنەکانی عێراق، 301 کاندید لەسەر 46 کورسیی تەرخانکراو بۆ چوار پارێزگاکەی هەرێمی کوردستان کێبڕکێ دەکەن.

ژمارەکان وا دەڵێن:  ژمارەی کاندیدەکان بەگوێرەی پارێزگاکان:

٠ لە پارێزگای هەولێر، 108 کاندید کێبرکێ لەسەر 15 کورسی بازنەکە دەکەن، لەگەڵ کورسییەکی کۆتای کریستیان.

٠ لە پارێزگای دهۆک، 58 کاندید کێبرکێ لەسەر 11 کورسی بازنەکە دەکەن، لەگەڵ کورسییەکی کۆتای کریستیان.

لە پارێزگاکانی سلێمانی و هەڵەبجە، 135 کاندید کێبرکێ لەسەر 18 کورسی بازنەکە دەکەن، لەم دوو پارێزگایەدا کورسیی تایبەت بۆ پێکهاتەکانی دیکە دانەنراوە.

لەلایەکی دیکەوە: لەو 46 کورسییە، 12 کورسی بۆ کۆتای ژنان تەرخانکراوە، پێنج کورسی بۆ سلێمانی و هەڵەبجە، چوار کورسی بۆ هەولێر و سێ کورسی بۆ دهۆک. ئەم ژمارەیە بەشێکە لە 83 کورسی گشتیی کۆتای ژنان لە پەرلەمانی عێراق لە کۆی 329 کورسییەکە.

ئەوەی پێویستە بیزانیت: جیا لەو 46 کورسییەی بۆ پارێزگاکانی هەرێمی کوردستان تەرخانکراوە، حیزب و لایەنە سیاسییەکان هەرێمی کوردستان بە تایبەتیش پارتی دیموکراتی کوردستان و یەکێتی نیشتمانیی کوردستان لە ناوچە کوردستانییەکانی دەرەوەی هەرێمی کوردستان و پارێزگاکانی دیکەی عێراق کاندیدیان هەیە.

٠ لە کەرکووک، کە 13 کورسی هەیە، هەریەک لە پارتی و یەکێتی 24 کاندیدیان هەیە.

٠ لە نەینەوا، کە 34 کورسی هەیە، پارتی 61 کاندیدی هەیە، لەکاتێکدا یەکێتی لە چوارچێوەی هاوپەیمانێتییەک لەگەڵ لایەنە عەرەبییەکان، بە گشتی 62 کاندیدیان هەیە.