حەجخوازانی حەجی ئەمساڵ تیروپشکیان بۆ دەکرێت

ئاڤا نیوز

ئامادەکارییەکانی بەڕێوەبەرایەتیی گشتیی حەج و عومرە بۆ وەرزی حەجی ساڵی 2026 بەردەوامە و لە نزیکترین کاتدا تیروپشک بۆ ناوی خوازیارانی حەج دەکرێت.

چیرۆکی سەرەکی: ئەمساڵ وەزارەتی ئەوقاف و کاروباری ئایینی پڕۆسەی ناونووسینی بۆ خوازیارانی حەج بەشێوەیەکی ئەلیکترۆنی ڕاگەیاند، سەرجەم ئەو کەسانەی بە نیازی حەجن لە ڕێگەی ئەلیکترۆنییەوە ناوی خۆیان تۆمار کرد، بەڕێوەبەرایەتیی گشتیی حەج وعومرەی هەرێمی کوردستانیش ئامادەکاری بۆ ڕاگەیاندنی ناوی خوازیارانی حەج دەکات، بۆ ئەوەی لەکاتی نزیکبوونەوەی وەرزی حەج سەرجەم ئامادەکارییەکان تەواو بکرێن.

لێدوانی فەرمی: کاروان ستوونی، وتەبێژی حەج وعومرەی هەرێمی کوردستان بە ئاڤای ڕاگەیاند، بەڕێوەبەرایەتیی گشتیی حەج و عومرە ماوەیەکی زۆرە دەستی بە ئامادەکارییەکانی پڕۆسەی حەج کردووە و ئێستا وردبینی بۆ ناوی خوازیارانی حەج دەکرێت. بەپێی ئەو وادەیەی بۆ حاجییانی عێراق دانراوە، دەبێت تا مانگی یەکی ساڵی 2026 هەموو کارەکان تەواو بکرێن.

زانیاریی زیاتر: کاروان ستوونی گوتیشی، پێشبینی دەکەین لە ماوەی دوو هەفتەی داهاتوودا ئامادەکارییەکان بۆ ڕاگەیاندنی ناوی خوازیارانی حەج تەواو بکرێن و تیروپشک ئەنجام بدرێت، هاوکات لە بەڕێوەبەرایەتیی گشتی بە هەماهەنگی لەگەڵ دەستەی باڵای حەج و عومرەی عێراقی خولێکی ئایتی بەڕێوەچووە بۆ بە ئەلیکترۆنیکردنی پشکنینی تەندروستیی خوازیارانی حەج، چونکە وڵاتی سعوودیە پشکنینی تەندروستی بەشێوەی ئەلیکترۆنی کردووەتە پێش مەرجی پێدانی ڤیزا.

ئەمەش بزانە: فەرمانبەرانی ئایتی لەسەرجەم نووسینگەکانی حەج وعومرە لە پارێزگا و ئیدارە سەربەخۆکان بەشدارییان لە خولی ئایتیدا کردووە، بۆ ئەوەی لەکاتی دەرچوونی ناوی حاجییان ڕاستەوخۆ بە هەماهەنگی لەگەڵ وەزارەتی تەندروستیی هەرێمی کوردستان دەست بە پشکنینی تەندروستی بۆ خوازیارانی حەج بکرێت، وڵاتی سعوودیە ساڵانە ڕێگە بە تەنیا 7%ـی ئەو کەسانە دەدات کە تەمەنیان لەسەرووی 70 ساڵییەوەیە، ئەگەر هەر کەسێکیش لە پشکنینی تەندروستی دەرنەچێت ئەگەری زۆرە ڤیزای پێ نەدرێت.