خۆتۆماركردن لە خولی پێداگۆجی بۆ هەڵگرانی بڕوانامەی ماستەر و دكتۆرا كارا كرا

ئاڤا نیوز

هەڵگرانی بڕوانامەی ماستەر و دكتۆرا؛ ئەوانەی بەنیازی بەدەستهێنانی نازناوی زانستین، دەتوانن ناوی خۆیان لە خولی یەكەمی پێداگۆجی تۆمار بكەن كە لەلایەن سەنتەری پێداگۆجی و پەرەپێدانی ئەكادیمی لە دەستەی كوردستانی دەكرێتەوە.

وێنە گەورەكە: خولی پێداگۆجی، خولی ڕێگا نوێیەكانی وانەوتنەوەیە و ماوەكەی شەش مانگە، تایبەتە بە هەڵگرانی ماستەر و دكتۆرای سەر بە میلاكی وەزارەتەكانی خوێندنی باڵا و پەروەردە كە دوای تەواوكردنی خولەكە، نازناوی زانستی بەدەستدەهێنن و دەتوانن لە زانكۆ و پەیمانگەكان وانە بڵێنەوە. هەڵگرانی ماستەر و دكتۆرا لە وەزارەت و دەستەكانی تر یاخود ئەوانەی دانەمەزراون، نازناوی زانستییان پێنادرێت مەگەر پشتگیریی وانەبێژی لە زانكۆیەك یاخود پەیمانگەیەك بهێنن، ئەوكات بۆ ماوەیەكی كاتی نازناویان پێدەدرێت.

 

ئاگادارینامەی فەرمی: سەنتەری پێداگۆجی و پەرەپێدانی ئەکادیمی لە دەستەی کوردستانی بۆ دیراساتی ستراتیژی و توێژینەوەی زانستی، ئاگاداری سەرجەم هەڵگرانی بڕوانامەی دكتۆرا و ماستەر دەکاتەوە کە ئێستا دەتوانن ناوی خۆیان تۆمار بکەن بۆ بەشداریکردن لە خولی یەکەمی پێداگۆجی بۆ بەدەستهێنانى نازناوى زانستى؛ خۆتۆماركردن ئێستا كارایە و تاوەكو 26-11-2025 بەردەست دەبێت.

مەرجەكان چین: بۆ بەشداریكردنی خوازیاران لە خولی پێداگۆجی، هەڵگرانی بڕوانامەی ماستەر یاخود دكتۆرا، مەرجە نمرەی 5 ـی لە تاقیكردنەوەی توانستی زمانی ئینگلیزی ئایەڵس (IELTS) یاخود هاوتاکانی لە  (TOEFL-IBT=59, TOEFL-PBT=414, Academic Pearson=52)هەبێت، یاخود بڕوانامەی توانستی زمانی ئینگلیزی ئاستی (pre-intermediate) لە یەکێک لە سەنتەرەکانی زمانی زانکۆکانی هەرێمی کوردستان هەبێت کە وەزارەتی خوێندنی باڵا پەسەندی کردووە و بڕوانامەكەشی سێ ساڵی بەسەردا تێپەڕ نەبووبێت.

هەنگاوەكانی پێشكەشكردن: خوازیار لەڕێگەی پڕكردنەوەی فۆرمێكەوە لەو بەستەرەی كە لە ئاڤا نیوز دانراوە، دەتوانێت داواكاریی پێشكەش بكات، دواتر بەڵگە و دۆكیۆمێنتە پێویستەكان لە فایلێكدا ئامادە بكات و دوای تەواوبوونی ماوەی پێشكەشكردن، سەنتەری پێداگۆجی پەیوەندی بە پێشكەشكارەوە دەكات، و كاتێكی بۆ دیاری دەكرێت بۆ هێنانی بەڵگەنامەكان.

بەڵگەنامەكان چین:

یەكەم: بڕوانامەی دكتۆرا یاخود ماستەر، ئەوانەی لە دەرەوەی وڵات خوێندوویانە پێویستە بڕیاری یەكسانكردنی بڕوانامەیان هەبێت.

دووەم: بڕوانامەی توانستی زمانی ئینگلیزیی پەسەندكراو.

سێیەم: نووسراوی فەرمیی لارینەبوون لە شوێنی كارەكەی.

چوارەم: كۆپییەكی ڕەنگاوڕەنگی پاسپۆرت.

پێنجەم: پسوولە (وەسڵ)ـی نرخی بەشداریکردن لە خولەکە، كە بڕەكەی 500 هەزار دینارە و دەتوانرێت بە سێ قیست بدرێت بەمەرجێك هیچ قستێك لە 150 هەزار دینار كەمتر نەبێت، پسوولەکە لە بەڕێوەبەرایەتیی ژمێریاریی دەستەی کوردستانی بۆ دیراساتی ستراتیژی و توێژینەوەی زانستی وەردەگیرێت.