ئیسرائیل: ئێمە دیاری دەکەین کە کام هێزی نێودەوڵەتیی دەچێتە ناو غەززە

ئاڤا نیوز

لەبارەی ئەو هێزە نێودەوڵەتییانەی کە بڕیارە لە کەرتی غەززە جێگیر بکرێن سەرۆکوەزیرانی ئیسرائیل دەڵێت: حکومەتەکەی دیاری دەکات کە کام هێز لە ‌غەززە قبووڵ ناکات. 

لێدوانی فەرمی: بنیامین نەتانیاهۆ، سەرۆکوەزیرانی ئیسرائیل ڕایگەیاند، ئێمە ئاسایشی خۆمان کۆنتڕۆڵ دەکەین هاوکات ئێمە بۆ زلهێزە نێودەوڵەتییەکان ڕوونمان کردووەتەوە کە ئیسرائیل دیاری دەکات کە کام هێز لای ئێمە قبووڵ ناکرێت، ئێمە بەم شێوەیە مامەڵەمان کردووە و بەردەوامیش دەبین.

زانیاریی بەدەستهاتوو: لە چوارچێوەی ئاگربەستی غەززەدا، پێشبینی دەکرێت بە پلەی یەکەم هێزەکانی وڵاتانی عەرەبی و ئیسلامی لە کەرتی غەززە جێگیر بکرێن.

لەلایەکی دیکەوە: ئەم داوایەی نەتانیاهۆ لەلایەن ئەمریکاوە قبووڵکراوە وەک، مارکۆ ڕوبیۆ، وەزیری دەرەوەی ئەمریکا ئاشکرای کرد، پێویستە ئیسرائیل ئاسوودە بێت لەگەڵ بەشداربووانی ئەو هێزە نێودەوڵەتییەی کە جێگیر دەکرێن.