ڕۆژانە لە هەرێمی کوردستان زیاتر لە دوو ملیۆن و 500 هەزار هێلکە دەخورێت

ئاڤا نیوز

هەرێمی کوردستان لە بەرهەمهێنانی هێلکە ئاستی خۆژییەنی تێپەراندووە و ڕۆژانە زیاتر لە پێنج ملیۆن هێلکە هەناردە دەکات، لە ناوخۆشدا هەموو ڕۆژێک حەوت هەزار کارتۆن ساغ دەکرێتەوە، بەپێی داتاکانیش هەموو ڕۆژێک دوو ملیۆن و 500 هەزار هێلکە لە ناوخۆی کوردستان بەکاردەهێنرێت.

وێنە گەورەکە: لە چوارچێوەی گرنگیدانی کابینەی نۆیەمی حکومەتی هەرێمی کوردستان بۆ کەرتی کشتوکاڵ، ڕۆژ لە دوای ڕۆژ پڕۆژە کشتوکاڵییەکان زیاتر گەشە دەسێنن و فراوانتر دەبن، لەنێو کەرتەکەشدا پڕۆژە پەلەوەرییەکان گەشەسەندنی بەرچاویان بەخۆیانەوە بینیوە، ئێستا لە بەرهەمهێنانی هێلکەدا هەرێمی کوردستان ڕۆژانە زیاتر لە سێ هێندەی بڕی پێویست بۆ پێداویستی ناوخۆ بەرهەمدەهێنێت و بەشی زۆریشی ڕەوانەی بازاڕەکانی عێراق دەکات.

لێدوانی فەرمی:  فیراس سدیق، بەڕێوه‌بەری سامانی ئاژەڵ لە وەزارەتی کشتوکاڵ بە ئاڤای وت، هەرێمی کوردستان لە بەرهەمهێنانی هێلکەدا گەیشتووەتە خۆژیەنی و لێشی زیادە، ڕۆژانە 23 هەزار کارتۆن هێلکە لە سەرتاسەری کوردستاندا بەرهەم دەهێنرێت، حەوت هەزار کارتۆن بۆ پێداویستیی ناوخۆی هەرێمی کوردستان بەکاردەهێنرێت و ئەوەی تری  لە بازاڕەکانی ناوەڕاست و خوارووی عێراق ساغ دەکرێنەوە.

ژمارەکان وادەڵێن: هەر کارتۆنێک 360 هێلکەی تێدایە، ئەگەر ئەو 360 هێلکەیە جارانی 23 هەزار کارتۆنی بەرهەمهێنراو بکرێت، ڕۆژانە هەشت ملیۆن و 280 هەزار هێلکە بەرهەمدەهێنرێت.

- لەو ژمارەیەش حەوت هەزار کارتۆنی بۆ ناوخۆ بەکاردێت کە ڕۆژانە دەکاتە دوو ملیۆن و 520 هەزار هێلکە.

- ڕۆژانە 16 هەزار کارتۆنیش هەناردەی شارەکانی ناوەڕاست و باشووری عێراق دەکرێت کە دەکاتە پێنج ملیۆن و 760 هەزار هێلکە.

ئەوەی پێویستە بیزانیت: ئەو هێلکەیەی بەرهەم دێت و لەناوخۆ ساغ دەکرێتەوە، بەشێکی لەلایەن کارگەکانی دروستکردنی شیرینی و کێک بەکاردێت و بەشێکی دیکەشی وەک خواردنی ژەمەکان هاونیشتمانییان دەیخۆن.

باکگراوند:  لە ساڵی 2019  تەنیا 11 پرۆژەی بەرهەمهێنانی هێلکە لە هەرێمی کوردستان هەبوون، ڕۆژانە سێ هەزار کارتۆن هێلکەیان بەرهەم دەهێنا، کە دەکاتە یەک ملیۆن و 80  هەزار هێلکە، بەڵام لە کابینەی نۆیەم ژمارەی پڕۆژەکانی بەرهەمهێنانی هێلکە گەیێنرانە 58 پڕۆژە و ئێستا هەرێمی کوردستان بەشێکی هەرە زۆری پێداویستی شارەکانی ناوەڕاست و خوارووی عێراق دابین دەکات.