گەنجێک لە هەولێر لە تۆڵەی هاککردنی مۆبایلەکەی هاوڕێکەی کوشت

ئاڤا نیوز

لە ڕووداوێکی تەقەکردندا لەناو بازاڕی هەولێر، کەسێک کوژرا و پۆلیسیش ئەمڕۆ ڕایگەیاند، هۆکاری شەڕەکە کێشەیەکی کۆنی نێوانیان بووە، تەقەکەرەکە دەستگیرکراوە و لێکۆڵینەوەش لە ڕووداوەکە بەردەوامە.

چیرۆكی سەرەكی: شەوی ڕابردوو لە نێو بازاڕی كۆتری سەلام لە هەولێر، شەڕ و دەمەقاڵێ لەنێوان دوو کەسدا دروست دەبێت، یەکێک لە شەڕکەرەکان تەقە لە هاوڕێکەی دەکات و دەیکوژێت، بەپێی زانیارییەکانی پۆلیس، هەردوو کەسەکە هاوڕێی یەکدین، هۆکاری شەرەکە کێشەیەکی کۆنی نێوانیان بووە و پەیوەندی بە هاکی مۆبایل و بردنی وێنەکانی ناویەوە هەبووە.

ڕاگەیێنراوی فەرمی: بەڕێوەبەرایەتیی پۆلیسی پارێزگای هەولێر،لە ڕوونکردنەوەیەکدا لەبارەی ڕووداوەکە ڕایگەیاندووە، "دوای ئاگاداركردنەوەمان لە بوونی ڕووداوێكی كوشتن لە بازاڕی هەولێر، تیمەکانیان چوونە شوێنەکە و لێکۆڵینەوەیان دەستپێکرد، دوای لێکۆڵینەوەی ورد و بەدواداچوونێکی چڕ، دەرکەوت شەڕەکە لەسەر کێشەیەکی کۆنی نێوانیان بووە، بکوژ ناوی (أ. هـ . ح)یە و بە چەكی جۆری دەمانچە، هاوڕێكەی بەناوی (ی. د. ع) کوشتووە، هەر دوای ڕووداوەکەش تیمەكانی پۆلیسی نەهێشتنی تاوان تۆمەتباری بکوژیان دەستگیرکرد و لێکۆڵینەوەش لە ڕووداوەکە بەردەوامە".

هۆکارە زانراوەکان: پۆلیسی هەولێر ڕاشیگەیاندووە، بكوژ لە دانپێدانانەكەیدا، وتوویەتی بەهۆی هاککردنی مۆبایلەکەم و بردنی ژمارەیەک وێنەی ناو مۆبایلەکەم لەلایەن ئەو کەسەوە تەقەم لێکردووە و کوشتوومە.