مانگی داهاتوو پڕۆژەی ڕیسایکلینی ئاوەڕۆی هەولێر دەستپێدەکات

ئاڤا نیوز

پرۆژەیەکی گەورەی ڕیسایکلینی ئاوی قورس و ئاوەڕۆی ماڵان بە گوژمەی نزیکەی لە 780 ملیۆن دۆلار لە سنووری پارێزگای هەولێر دەست بە دروستکردنی دەکرێت، بڕیارە مانگی داهاتوو دەست بە جێبەجێکردنی بکرێت.

وێنە گەورەكە: دوای ئەوەی وەزارەتەكانی پلاندانان، شارەوانی و گەشتوگوار، بەڕێوەبەرایەتیی گشتیی نەخشەدانانی ئاوەدانی بەهاوبەشی لەگەڵ ئاژانسی جایكای ژاپۆنی ماستەر پلانی شاری هەولێریان هەمواركردەوە، بەمەش پڕۆژەیەکی ستراتیژیی حکومەتی هەرێمی کوردستان بۆ ریسایکلینی ئاوی قورس و ئاوەڕۆی ماڵان لە سنووری هەولێر جێبەجێ دەکرێت.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤای وت: پڕۆژەکە لە توانایدایە 840 هەزار مەتر سێجا ئاوی قورس و ئاوەڕۆکانی هەولێر پاک بکاتەوە، لەلایەن کۆمپانیایەکی یابانی و کۆمپانیای ئاوزانی ناوخۆیی جێبەجێ دەکرێت، ئەو بەشەی کۆمپانیا یابانییەکە کاری تێدا دەکات 200 ملیۆن دۆلاری بۆ تەرخان دەکرێت و مانگی نۆی ئەمساڵ گرێبەستەکەی واژۆ کراوە، هاوکات ئەو بەشەی کۆمپانیا ئاوزان کاری تێدا دەکات، نزیکەی 579 ملیۆن دۆلاری بۆ تەرخان دەکرێت و هەفتەی داهاتوو گرێبەستەکەی واژۆ دەکرێت.

زانیاریی زیاتر: بە گوتەی ئاری ئەحمەد، پڕۆژەکە لەسەر ڕووبەری 210 دۆنم زەوی لە نزیک گوندی عارەبکەند دروست دەکرێت، لەڕێگەی چەند هێڵێکەوە ئاوی قورس و ئاوەڕۆی هەولێر دەگەیێنرێتە دوو هێڵی تایبەتی پڕۆژەکە و پاشان دەگاتە وێستگەی پڕۆژەکە. بەجێبەجێکردنی پڕۆژەکە کێشە و گرفتی ئاوەڕۆی شاری هەولێر بۆ نزیکەی 35 ساڵی داهاتوو چارەسەر دەکرێت.

بۆچی گرنگە: ئەو ئاوەی لە پڕۆژەکەدا ڕیسایکلینی بۆ دەکرێت، بۆ ئاودانی پشتێنەی سەوزایی هەولێر، پارک و باخچە و کارگەکان سوودی لێ وەردەگیرێت و بەکاردەهێنرێتەوە.