مەسرور بارزانی ماستەرپلانی گەشتیاریی گەلی عەلی بەگی بەسەرکردەوە

ئاڤا نیوز

سەرۆکوەزیران مەسرور بارزانی لەکاتی سەردانی بۆ ئیدارەی سەربەخۆی سۆران خواستی خۆی بۆ پەرەپێدانی کەرتی گەشتیاریی لەناوچەکە خستەڕوو و ڕایگەیاند: دەمانەوێت سەرنجی زیاتری گەشتیاران بخەینە سەر ئەم ناوچەیە.

ئەوەی ئێستا ڕوودەدات: سەرۆکوەزیران مەسرور بارزانی ڕۆژی دووشەممە سەردانی تاڤگەی گەلی عەلی بەگی کرد کە ئاوەکەی لە بێخاڵەوە ڕاکێشراوە و بەشێکە لە ماستەرپلانەکە، هەروەها سەردانی کۆڕنیشی کاولۆکان کرد کە یەکێک لە ویرەکان (پەیژەکانی) تەواو بووە و بڕیارە سێ ویری دیکەیش دروست بکرێت.

- هەر لەمیانەی سەردانەکەی بۆ سۆران، سەرۆکوەزیران بەرزەپردی دەروازەی سۆرانی کردەوە، کە یەکێکە لە پڕۆژە ستراتیژییەکانی کابینەی نۆیەمی حکومەتی هەرێمی کوردستان، کە پڕۆژەکە لە دوو بەرزەپرد پێکدێت، درێژی یەکێکیان 154 مەتر، بەرزی 15 مەتر و پانی 11 مەترە، بەرزە پردی دووەم درێژی 57  مەتر، بەرزی 8 مەتر و پانی 11مەترە.

لێدوانی فەرمی: سەرۆکوەزیران مەسرور بارزانی لە ئیدارەی سەربەخۆی سۆران ڕایگەیاند: ئەمەی کراوە بەشێکە لەو پڕۆژانەی کە حکومەتی هەرێمی کوردستان بۆ پەرەپێدانی کەرتی ڕێگاوبان گرتوویەتییە بەر. 

- ئێرە ناوچەیەکی سەرنجڕاکێشە و هیوادارام هاووڵاتییان ژینگەکەی بپارێزن، هەروەها دەمانەوێت سەرنجی زیاتری گەشتیارانی بخەینە سەر.