دەم پارتی: گەریلاکان لە تورکیا و باکووری کوردستان کشاونەتەوە و کاتی هەموارکردنەوەی یاساکانە لە تورکیا

ئاڤا نیوز

تونجەر باکرهان، هاوسەرۆکی گشتیی دەم پارتی: بڕیاری کشاندنەوەی گەریلاکان لە تورکیا و باکووری کوردستان، سەلمێنەری ئەوەیە پەکەکە لەگەڵ ئاشتیدایە و بەهێزترین پەیامە بۆ ئەم قۆناغە نوێیە و دەرفەت بۆ سەرخستنی پرۆسەکە دەڕەخسێنێت.

چیرۆکی سەرەکی: هاوسەرۆکانی گشتیی دەم پارتی، ستایشی بڕیارەکەی دوێنێی پەکەکە دەکەن بۆ کشاندنەوەی هێزەکانی لە تورکیا و باکووری کوردستان و ئاماژە بەوە دەدەن، ئەم بڕیارە کۆتایی هێناوە بە قۆنا‌غی یەکەمی پرۆسەکە و ئێستا تۆپ لە گۆڕەپانی تورکیادایە.

لێدوانی فەرمی: تونجەر باکرهان، هاوسەرۆکی گشتیی دەم پارتی لە کۆنگرەیەکی ڕۆژنامەوانیدا لە ئیستانبوڵ ئەمڕۆ 27-10-2025 ئاماژەی بەوە دا بڕیارەکەی دوێنێ قەڵەمبازییەکی مەزنە بۆ بوونیادنانەوەی داهاتوویەکی هاوبەش. ئەگەر پرۆسەکە بە باشی بەڕێوە ببرێت، کێشەکانی تورکیا بە دیالۆگ چارەسەر دەکرێن و بەمەش نموونەیەکی هیوابەخش پێشکەشی جیهان دەکرێت.

بە تەنیشت ئەم بابەتەوە: باکرهان سەرنج دەخاتە سەر ئەوەی دوای تەواوبوونی کشاندنەوەی گەریلاکان، ئێستا کاتی ئەوەیە بچنە ناو قۆناغی دووەمی پرۆسەکەوە کە هەستیارتر و گرنگترە. ئەویش ڕەخساندنی زەمینەسازیی یاسایی و سیاسییە. ئەم قۆناغەش چەندە سەختە، هێندەش واتادارە و ئاشتییە بۆ تەواوی تورکیا.

ئەوەی پێویستە بیزانیت: ئەو دەڵێت پرۆسەکە بە هەموارکردنەوەی یاساکانی تورکیا بەرەوپێش دەچێت. دەبێت پەرلەمانی تورکیا بەرپرسیارانە مامەڵە بکات و کارئاسانی بکات بۆ سەرخستنی پرۆسەکە. هەموو لایەک و دەوڵەت و دەسەڵاتی دادوەریش بەرپرسە لەسەرخستنی پرۆسەکە، نەک تەنیا لایەنێک. 

لە لایەکی دیکەوە: تونجەر باکرهان هیوای خواست میدیاکانی تورکیا لە بەکارهێنانی ئەو زمانە دووربکەونەوە کە لەبری خزمەتکردن بە پرۆسەکە، لە دژی دەوەستنەوە و دەشڵێت: تەنیا دانوستانی دیموکراسییانە دەتوانێت ڕێ لەو شەپۆلە مەترسیدارانە بگرێت کە ڕوو لە تورکیا و ناوچەکە دەکەن. ئەمەش بە دەرچووانی یاساکانی تێکەڵاوبوونی دیموکراتییانە بەدی دێت.