وەزارەتی خوێندنی باڵا وەڵامی پەڵپی دەرچووانی 12ی ئامادەیی دەداتەوە

ئاڤا نیوز

وەزارەتی خوێندنی باڵا و توێژینەوەی زانستی ئامادەکاری دەکات بۆ ئەوەی لە چەند ڕۆژی داهاتوودا وەڵامی پەڵپی دەرچووانی 12ـی ئامادەیی بداتەوە.

وێنە گەورەکە: نزیکەی 10 ڕۆژ بەسەر ڕاگەیاندنی ئەنجامی زانکۆلاین تێپەڕ دەبێت، ناوی 54 هەزار و 278 پێشکەشکار لە زانکۆ و پەیمانگە حکومییەکان گەڕایەوە و هەزار و 387 قوتابی بەهۆی کەمی نمرە و هەڵبژاردنی ئەو بەشانەی کە لەگەڵ نمرەکەیان ناگونجێت وەرنەگیران.

زانیاریی تایبەت: سەرچاوەیەک لە وەزارەتی خوێندنی باڵا و توێژینەوەی زانستی بە ئاڤای گوت، "ئێستا تیمەکان کار لەسەر پێداچوونەوە بە پەڵپی قوتابییەکان دەکەن، لەچەند ڕۆژی کەمی داهاتوو ئەنجامەکەی ڕادەگەیێنرێت،  14 هەزار  و 731 کورسی بە بەتاڵی ماوەتەوە، بەشێکیان ئەو کورسیانە پڕ دەکرێنەوە."

لەلایەکی دیکەوە: هەزار و 368 قوتابی ناوچە کوردستانییەکانی دەرەوەی ئیدارەی هەرێم، لە زانکۆ و پەیمانگە حکومییەکانی هەرێمی کوردستان وەردەگیرێن و بڕیارە لەچەند ڕۆژی داهاتوودا فۆڕم زانکۆلاینیان بۆ کارا بکرێت.