مەسرور بارزانی: ئەوەی دەیڵێین دەتوانین بیکەین

ئاڤا نیوز

مەسرور بارزانی لە کەرنەڤاڵی جەماوەری بانگەشەی هەڵبژاردنی پارتی لە ئیدارەی سەربەخۆی سۆران ڕایگەیاند: ئێمە بەرەو هەڵبژاردنێکی چارەنووسساز دەڕۆین، پێویستە بەشدارییەکی کارای هەڵبژاردن بکەین، تاوەکو هێزی پارتی نیشانی هەموو دونیا بدەین.

وێنە گەورەکە: بە ئامادەبوونی مەسرور بارزانی، جێگری پارتی دیموکراتی کوردستان، کەرنەڤاڵی جەماوەری لیستی 275ـی پارتی لە ئیدارەی سەربەخۆی سۆران بەڕێوەدەچێت.

زانیاریی زیاتر: پارتی لە بازنەی هەولێر 30 کاندیدی هەیە و لە هەڵبژاردنەکانی ڕابردوو لە ئیدارەی سەربەخۆی سۆران پارتی دەنگی زۆرینەی هێناوە و بە جیاوازییەکی زۆر لە پێش لیستەکانی تر بووە.

لێدوانی فەرمی: مەسرور بارزانی لەمیانەی کەرنەڤاڵەکەدا وتارێکی پێشکەش کرد و ڕایگەیاند: ئێمە بەرەو هەڵبژاردنێکی چارەنووسساز دەڕۆین، پێویستە بەشدارییەکی کارای هەڵبژاردن بکەین، تاوەکو هێزی پارتی نیشانی هەموو دونیا بدەین.

- پێویستە لە ڕۆژی هەڵبژاردن بچینە دەنگدان و گەورەترین سەرکەوتن بۆ پارتی بەدەستبهێنین.

-بە ڕەوشتی پارتیایەتی بەشداری لە هەڵبژاردن دەکەین. 

- لە هەڵبژاردنی ڕابردوو وتمان، ئێستاش دەڵێینەوە ناتوانن ڕامان بگرن، بە کردەوەش سەلماندوومانەوە کە ئەوەی دەیڵێین دەتوانین بیکەین. 

- پارتی لەسەر ئاستی کوردستان هێزی یەکەمە و ڕکابەرێکی نییە، دەمانەوێت بە پشتیووانی ئێوە ئەو هێزە ببەینە بەغدا.

- دەمانەوێت دەنگی هاووڵاتیانمان لەگەڵ بێت، بۆ ئەوەی بەرگری لە دەستکەوتەکان بکەین، ئێمە تەنیا بەڵێن نادەین، بەڵکو جێبەجێی دەکەین.

- ئەوەی کردوومانە لە پڕۆژەی رووناکی، هەژماری من، پڕۆژەی ئاو و کارەکانی دیکە بۆ خزمەتی هاووڵاتیان بووە.

- لە فەرهەنگی پارتیدا خۆبەدەستەوەدان و خۆچەماندن نییە، ئێمە دەمانەویت خەڵکی کوردستان وەک وڵاتانی پێشکەوتوو بژین.

- دەمانەوێت حکومەتێک پێکبێت دوور بێت لە بەرژەوەندی و دەستکەوتی شەخسی، بەرنامەی ئێمەش خزمەتکردنی خەڵک و جێبەجێکردنی پڕۆژەکانە.