مەسرور بارزانی: ڕێگا نادەین عێراق بەرەو مەرکەزییەت و دیکتاتۆرییەت بگەڕێتەوە

ئاڤا نیوز

مەسرور بارزانی لەمیانەی بانگەشەی هەڵبژاردنی پارتی لە ئیدارەی سەربەخۆی سۆران چەند پەیامێکی ئاراستەی خەڵکی کوردستان کرد و ڕایگەیاند: پارتی لەگەڵ هەموو ئەو لایەنانە دەوەستێت کە داوای دادپەروەری دەکەن،  ڕێگاش نادەین عێراق بەرەوە مەرکەزییەت و دیکتاتۆرییەت بگەڕێتەوە.

چیرۆکی سەرەکی: ئەمڕۆ دووشەممە، بە بەشداری سەدان کەس لە ئیدارەی سەربەخۆی سۆران گەورەترین کەرنەڤاڵی جەماوەری لیستی 275ـی پارتی لە ئیدارەی سەربەخۆی سۆران بەڕێوەچوو.

لێدوانی فەرمی: مەسرور بارزانی، جێگری سەرۆکی پارتی دیموکراتی کوردستان لە میانەی کەرنەڤاڵەکە ڕایگەیاند: دەبێت کۆتایی بە خواردنی مافی هەرێمی کوردستان بێت و لەگەڵ هەموو نەتەوە و پێکهاتەکانی دیکەی عێراق دەوەستین، لەگەڵ هەموو ئەو لایەنانەش دەوەستین کە داوای دادپەروەری دەکەن.

بەشێکی دیکە لە وتارەکەی مەسرور بارزانی:

٠ سەردەمی مەرکەزیەت و دیکتاتۆریەت کۆتایی هاتووە، هەرکەسێک بیر لەوە بکاتەوە عێراق بەرەو مەرکەزیەت بباتەوە، بەرەو دیکتاتۆریەت هەنگاو دەنێت، ئێمە خەڵکێکی وشیارمان هەیە، هێشتا پێشمەرگەی قارەمان هەیە، بیری ئازادیخوازی لە کوردستان چەسپاوە و هێشتا بەردەوامە و بەهیچ جۆرێک ڕێگە نادەین جارێکی دیکە عێراق بەرەو مەرکەزیەت و دیکتاتۆریەت بگەڕێتەوە.

٠ دەمانەوێت ئەزموونی خۆمان لەگەڵ لایەنەکانی دیکەی عێراق هاوبەشی بکەین و دەمانەوێت یارمەتی ئەوانیش بدەین، دەمانەوێت عێراق کە وڵاتێکی دەوڵەمەندە پێش بکەوێت.

٠ ئێمە دەمانەوێت هەموو ڕۆژهەڵاتی ناوەڕاست بەرەو ئاشتەوایی هەنگاو بنێت.

٠ دەمانەوێت حکومەتێک پێکبێت دوور بێت لە بەرژەوەندی و دەستکەوتی شەخسی، دەبێت ئەوە بزانن بەرنامەی زۆر گەورەمان بۆ پێشخستنی کوردستان هەیە.