ترەمپ لەبارەی تاقیکردنەوەی مووشەک وەڵامێکی تووندی پووتین دەداتەوە

ئاڤا نیوز

لە وەڵامێکی توونددا بۆ تاقیکردنەوەی مووشەکی نوێی ڕووسیا، دۆناڵد ترەمپ، ڕەخنەی لە ڤلادیمێر پووتین، سەرۆکی ڕووسیا گرت و ڕایگەیاند، کە کاری پووتین کۆتاییهێنانە بە جەنگ، نەک تاقیکردنەوەی مووشەک. جەختی لەسەر توانای سەربازی ئەمریکا کردەوە و بە پووتینی وت کە "لە پەنای گوێیانین."

چیرۆکی سەرەکی: لەکاتی سەردانی بۆ وڵاتانی ئاسیا دۆناڵد ترەمپ لە ناو فڕۆکەکەیدا ڕووبەڕووی پرسیاری ڕۆژنامەنووسێک بووەوە سەبارەت بە تاقیکردنەوەی مووشەکێکی نوێی ڕووسیا کە توانای بڕینی 12 هەزار کیلۆمەتری هەیە. ترەمپیش وەڵامێکی تووندی دایەوە.

لێدوانی فەرمی: ترەمپ وتی: "ڕووسیا دەزانێت کە ئێمە باشترین ژێردەریایی ئەتۆمیمان لە جیهاندا هەیە، کە ئێستا لە نزیک کەناراوەکانی ڕووسیان. پێویستمان بەوە نییە 12 هەزار کیلۆمەتر ببڕین بۆ ئەوەی بگەینە ڕووسیا چونکە لە پەنای گوێیانین."

سەرۆکی ئەمریکا ئاماژەی بەوەشدا کە نە ئەمریکا گاڵتە لەگەڵ ڕووسیا دەکات و نە ڕووسیاش گاڵتە لەگەڵ ئەمریکا دەکات، چونکە ئەمریکاش بە بەردەوامی مووشەکی نوێ تاقیدەکاتەوە.

ترەمپ بە تووڕەییەوە وەڵامی لێدوانەکەی پووتینی دایەوە و وتی: "بۆ پووتین گونجاو نییە ئەو جۆرە قسانە بکات. کاری ئەو ئەوەیە کۆتایی بە جەنگ بهێنێت نەک مووشەک تاقیبکاتەوە."