بە ئامادەبوونی سەرۆک بارزانی، کۆنفڕانسی زانستیی نێودەوڵەتیی تایبەت بە جینۆساید بەڕێوەدەچێت

ئاڤا نیوز

بە ئامادەبوونی سەرۆک بارزانی، کۆنفڕانسێکی زانستیی نێودەوڵەتیی تایبەت بە جینۆساید، لە شاری دهۆک دەست بە کارەکانی دەکات و دوو ڕۆژ بەردەوام دەبێت.

چیرۆکی سەرەکی:  ئەمڕۆ سێشەممە 28-10-2025، لە چوارچێوەی هەوڵەکانی بە دیکۆمێنت کردنی ئەو جینۆسایدانەی کە بەرامبەر گەلی کورد کراون، لە هەمان کاتیش مامەڵەی زانستی لەگەڵ ئەو پرسە، بە ئامادەبوونی سەرۆک بارزانی، پێنجەمین کۆنفڕانسی زانستیی نێودەوڵەتیی (دیکۆمێنتکردنی زانستی تاوانەکانی ئەنفال و گۆڕە بە کۆمەڵەکان، بەرەو دانپێدانانی نێودەوڵەتیی بە جینۆسایدی گەلی کورد) لە زانکۆی دهۆک بەڕێوەدەچێت، کۆنفڕانسەکە بە ڕێنمایی و سەرپەرشتیی سەرۆک بارزانی ڕێکخراوە.

ئەوەی پێویستە بیزانیت: لە دوو ڕۆژی کارەکانی کۆنفڕانسەکە ژمارەیەک پانێڵ دەربارەی بابەتی زانستی و ڕۆڵ و کاریگەرییان لە پرسی جینۆساید پێشکەش دەکرێن، لەوانە:

- تەکنەلۆژیای DNA و ڕۆڵی لە ناسینەوە و دووبارە بەخاکسپاردنەوەی قوربانییانی جینۆساید.

- جینۆسایدی نەرم لە بەرامبەر هەرێمی کوردستان لە ڕێگەی پەکخستنی ماددە دەستوورییەکان.

- ژیریی دەستکرد تا چەند هاوکار دەبێت لە ڕێگری کردن لە جینۆساید یان دەبێتە ئامڕازێک بۆ ئەنجامدانی جینۆساید.

- ئاڵنگاری یاسایی و ئەخلاقی سەردەم.

- مۆدێلەکانی زانستی بۆ ناساندنی جینۆساید.

- ئەرشیفی نەتەوەیی و دیکۆمێنتکردنی جینۆساید.

زانیاریی زیاتر: ژمارەیەک لە لێکۆڵەر و پسپۆڕان و مامۆستایانی زانکۆی ناوخۆ و دەرەوە بەشداری لە کۆنفڕانسەکە دەکەن.