جەمیل بایک: کاتی ڕەخساندنی زەمینەسازیی یاسایی هاتووە بۆ سەرخستنی پرۆسەی ئاشتی

ئاڤا نیوز

جەمیل بایک ڕایگەیاند، بڕیاری کشاندنەوەی گەریلاکان لە تورکیا و باکووری کوردستان سەلمێنەری پێداگیری ئەوانە بۆ سەرخستنی پرۆسەی ئاشتی و کۆمەڵگەی دیموکرات.

لێدوانی فەرمی: جەمیل بایک، هاوسەرۆکی کۆنسەی بەڕێوەبەری کەجەکە لە چاوپێکەوتنێک لەگەڵ ئاژانسی هەواڵی فورات ئاماژە بەوە دەدات وەک بە دەمەوەهاتن بۆ بانگەوازەکەی ئۆجەلان و بۆ خێراتر بەرەوپێشچوونی پرۆسەی ئاشتی و ڕێگەنەدان بۆ گەیشتنە بنبەست و لەباربردنی پرۆسەکە، بڕیاری کشاندنەوەی گەریلاکانیان داوە لە تورکیا و باکووری کوردستان. 

بە تەنیشت ئەم بابەتەوە: بایک جەخت لەوە دەکاتەوە تورکیا نابێت بە چاوێکی ئەمنیی و تەنها بە جەختکردنەوە لە چەکدانان بۆ پرسی کورد بڕوانێت و دەڵێت: پێویستە دەوڵەت تا زووە ژمارەیەک یاسا دەربکات بۆ یەکگرتنی دیموکراتییانە و ئازاد.

-تاوەکوو ئێستا حکوومەتی تورکیا هیچ هەنگاوێکی یاسایی و سیاسی نەناوە لەو پێناوەدا. ئەمەش لە بەرژەوەندی پرۆسەکە و بە دیموکراسیبوونی تورکیادا نییە. 

پێویستە ئەمەش بزانیت: جەمیل بایک جەخت لەوە دەکاتەوە ئێستا چوونەتە ناو قۆناغی دووەمی پرۆسەکە و تۆپەکە لە گۆڕەپانی تورکیادایە.

- پەکەکە خۆی هەڵوەشاندووەتەوە و کۆتایی هێناوە بە خەباتی چەکداری. کاتی ئەوەیە تورکیا زەمینەی یاسایی بۆ سەرخستنی پرۆسەکە بڕەخسێنێت و دان بە مافی هیوادا بنرێت بۆ ئۆجەلان و بە مەرج ئازاد بکرێت. ئەمە بووەتە پێویستییەکی حەتمی و مێژوویی.