مەسرور بارزانی لەڕێگەی ئاڤاوە پەیامێک بۆ بەغدا دەنێرێت

ئاڤا نیوز

 

سەرۆکوەیران مەسرور بارزانی دەڵێت، "دەمانەوێت کوردستان بکەینە شوێنێک بتوانێت کارەبا بداتە عێراق  و وڵاتانی دەوروبەریش." داوایشی لە خەڵکی کوردستان کرد "لە کردنەوەی پڕۆژەکانی حکومەت بێزار نەبن".

 

چیرۆکی سەرەکی؛ سەرۆکوەزیرانی کوردستان، پڕۆژەی ڕاكێشانی هێڵی گازی سرووشتی هەولێر - دهۆکی بە تێچووی 591 ملیۆن دۆلار  کردەوە، کە ئامانج لێی گەیاندنی غازی سرووشتییە بۆ وێستگەی کارەبای کواشێ لە قەزای سێمێل.

 

لەلایەکی دیکە: لە لێدوانێکی تایبەتدا بۆ ئاڤا سەرۆکوەزیران مەسرور بارزانی ڕایگەیاند، "هیوادارین لە بواری کارەبا زیاتر هاوکاریی حکومەتی عێراق بکەین بەتایبەتی ئەو شوێنانەی کە لە هەرێمی کوردستان دابڕێنراون". گوتیشی، "ئەگەر بیانەوێت [عێراق] هاوکارییان بکەین ئێمە دەتوانین هاوکارییان بکەین لە بواری کارەبا، ئامادەییشمان دەربڕیووە بۆ ئەو مەبەستە."

 

زانیاریی زیاتر؛ لە وەڵامی پرسیارێکی پەیامنێری ئاڤا کە پلانی حکومەتی کوردستان بۆ دهۆک و بادینان چییە؟ سەرۆکوەزیران گوتی، "بۆ ئێمە کوردستان هەمووی وەک یەکە و جیاوازی نییە بچینە هەر شوێنێک پرۆژە و خزمەتگوزاریی تیادا پێشکەش دەکەین".

 

پلانی داهاتوو؛ سەبارەت بەوەی سبەی چ پرۆژەیەکی نوێ دەکاتەوە، مەسرور بارزانی گوتی، "جارێ با چاوەڕێ بین و بزانین چی دەکەین"، هاوکات داوایشی لە خەڵك کرد لە "کردنەوەی ئەو پرۆژانەی حکومەت ماندوو نەبن."

 

ئەوەی پێویستە بیزانیت؛ لە بەشێكی دیکەی قسەکانیدا کە ئایا داهاتووی کوردستان لەبواری گازی سرووشتی بەرەو کوێ دەچێت؟ سەرۆکوەزیرانی کوردستان بە ئاڤای گوت، "هیوامان ئەوەیە زیاتر سوود لەو گازە وەربگرین کە ئێستا هەمانە  و پێداویستی ناوخۆی هەرێمی کوردستانی پێ پڕبکەینەوە."