توێژەرێکی کۆمەڵایەتی ژیریی دەستکرد بۆ بەرهەمهێنانی فیلم کارتۆن و ئەنیمەیشنی پەروەردەیی بەکاردەهێنێت

ئاڤا نیوز

 

لە هەنگاوێکی نوێدا بۆ بەکارهێنانی تەکنەلۆژیای هاوچەرخ لە بواری پەروەردەی منداڵاندا، خاتوو پەیام ئیبراهیم سەمین، توێژەری کۆمەڵایەتی، چیرۆکنووس و شارەزای ئەدەبی منداڵان لە شاری سلێمانی، پەنای بۆ ژیریی دەستکرد بردووە بۆ بەرهەمهێنانی زنجیرەیەک فیلم کارتۆن و ئەنیمەیشنی پەروەردەیی.

 

بۆچی گرنگە؛ ئەم دەستپێشخەرییە لە کاتێکدایە کە ژیریی دەستکرد بە شێوەیەکی بەربڵاو لە سۆشیاڵ میدیادا بەکاردەهێنرێت و هەندێک جار بۆ مەبەستی نەشیاو و بڵاوکردنەوەی زیانبەخش بەکاردێت. بەڵام پەیام ئەم تەکنەلۆژیایەی کردووەتە هەلێک بۆ خزمەتکردنی بواری پەروەردە و پێشکەشکردنی چیرۆکی فێرکاری بە زمانی کوردی بە منداڵان.

 

لێدوانی فەرمی؛ لە دیمانەیەکدا لەگەڵ چۆمان مەحمود، پەیامنێری ئاڤا خاتوو پەیام ئیبراهیم ئاشکرای کرد کە بیرۆکەی ئەم کارەی لەوەوە سەرچاوەی گرتووە کە ساڵانێکی زۆرە چیرۆکی منداڵان لە شێوەی کتێبدا چاپ و بڵاودەکاتەوە، بەڵام لەگەڵ پێشکەوتنی تەکنەلۆژیا و زۆربوونی بەکارهێنانی ئایپاد و یوتیوب لەلایەن منداڵانەوە، پێویستە بە شێوازی نوێ و سەرنجڕاکێشتر چیرۆکەکانیان پێشکەش بکرێت.

 

ئەوەی پێویستە بیزانیت؛ پەیام خۆی چیرۆکەکان دەنووسێت و دەیانخوێنێتەوە، پاشان بە بەکارهێنانی پرۆگرامەکانی ژیریی دەستکرد، دەقی چیرۆکەکان دەکات بە ڤیدیۆی ئەنیمەیشن و فیلم کارتۆنی جوڵاو، و لە سۆشیاڵ میدیادا بڵاویان دەکاتەوە. یەکێک لە بەرهەمەکانیشی تایبەتە بە زیانەکانی زۆر بەکارهێنانی ئایپاد، کە پەیامێکی پەروەردەیی ڕاستەوخۆیە بۆ منداڵان و خێزانەکانیان.