کچێکی کورد لە قەڵادزێ داهێنانێکی کردووە و لە بەریتانیا خەڵاتێکی نێودەوڵەتیی بردەوە

ئاڤا نیوز

 

هاژە حەسەن، کچێکی گەنجی کورد خاوەن بڕوانامەی ماستەر لە بواری کشتوکاڵدا، لەسەر ئاستی نێودەوڵەتی بووە جێی سەرنج و داهێنانەکەی لە بواری بەکارهێنانەوەی پاشماوەی پەلەوەری بۆ بەرهەمهێنانی پەینی سرووشتی، خەڵاتی یەکەمی لە پێشبڕکێیەکی جیهانیدا لە وڵاتی بەریتانیا پێ بەخشرا.

 

ئەوەی پێویستە بیزانیت؛ هاژە حەسەن، کە دانیشتووی قەزای قەڵادزێیە، پسپۆڕی خۆی لە بواری کشتوکاڵدا کردووەتە پرۆژەیەکی کارا و کارگەیەکی بۆ بەرهەمهێنانی پەینی ئەندامی دامەزراندووە. ئەم کارگەیە نەک تەنها یارمەتیی جووتیارانی ناوچەکەی داوە، بەڵکو بووەتە نموونەیەکی سەرکەوتووی پرۆژەی دۆستی ژینگە.

 

زانیاریی زیاتر؛ لە 23ی ئەم مانگە، خاتوو هاژە حەسەن بەشداریی لە "پێشبڕکێی ژنانی داهێنەر" لە بەریتانیا کرد. لەم پێشبڕکێیەدا کە نوێنەرانی 25 وڵاتی جیهان ئامادەی بوون، پرۆژەکەی هاژە توانیی پلەی یەکەم بەدەست بهێنێت و خەڵاتی سەرەکیی پێشبڕکێکە مسۆگەر بکات.

 

لەلایەکی دیکە؛ کارگەکەی خاتوو هاژە ساڵانە نزیکەی نۆ هەزار دەبە پەینی شل و 15 تەن پەینی وشک بەرهەم دەهێنێت، کە سوودێکی زۆری بۆ کەرتی کشتوکاڵی ناوچەکە هەبووە. یەکێک لە تایبەتمەندییە هەرە گرنگەکانی ئەم کارگەیە ئەوەیە کە بە تەواوی دۆستی ژینگەیە و هیچ جۆرە پاشماوەیەکی زیانبەخشی نییە، ئەمەش وای کردووە پرۆژەکەی لەسەر ئاستی جیهان بایەخی پێ بدرێت.