سەگی بێلانە بووە هۆی ڕووداوێکی هاتووچۆ و سێ کەس گیانیان لەدەست دا

ئاڤا نیوز

 

بەیانیی ڕۆژی سێشەممە، لە ڕووداوێکی دڵتەزێنی هاتووچۆدا لە شاری سلێمانی، سێ گەنج گیانیان لەدەست دا و گەنجێکی دیکەش ڕزگاری بوو. ڕووداوەکە کاتژمێر 4:47 خولەکی بەرەبەیان لەبەردەم نەخۆشخانەی شار لەسەر شەقامی بازنەیی مەلیک مەحمود ڕووی دا، کاتێک چوار هاوڕێ لە گەڕانەوەدا بوون لە فڕۆکەخانەی سلێمانی.

 

زانیاریی زیاتر؛ بەپێی زانیارییەکانی پەیامنێری ئاڤا، چوار گەنجەکە کە تەمەنیان لەنێوان 25 بۆ 35 ساڵیدایە، بە ئۆتۆمبێلێکی جۆری مێرسیدس، هاوڕێیەکیان لە فڕۆکەخانەی نێودەوڵەتیی سلێمانی هێناوەتەوە کە تازە لە دەرەوەی وڵات گەڕابووەوە.

 

چیرۆکی سەرەکی؛ شایەتحاڵان باس لەوە دەکەن کە ئۆتۆمبێلەکە بە خێراییەکی زۆر ڕۆیشتووە. لەبەردەم نەخۆشخانەی شار، شۆفێرەکە هەوڵیداوە خۆی لە سەگێکی بێلانە لابدات بۆ ئەوەی لێی نەدات. بەڵام بەهۆی خێرایی زۆرەوە کۆنترۆڵی لەدەستداوە و دوای ئەوەی لە سەگەکەی داوە، ئۆتۆمبێلەکە کێشاوێتی بە شۆستە و ستوونێکی کارەبا و چەند دارێکدا، دواجاریش بەر قادرمەی بەردەم چەند دوکانێک کەوتووە.

 

کاریگەری و لێکەوتەکان؛ لە ئەنجامی سەختیی ڕووداوەکە، دوو سەرنشینی ئۆتۆمبێلەکە دەستبەجێ گیانیان لەدەستداوە، کە یەکێکیان ئەو گەنجە بووە کە تازە لە دەرەوەی وڵات گەڕابووەوە. قوربانیی سێیەمیش دوای نزیکەی چارەکێک لە ڕووداوەکە، بەهۆی سەختیی برینەکەیەوە گیانی لەدەستداوە.

 

تەنها یەکێک لە سەرنشینەکان ڕزگاری بووە، کە لە کورسیی دواوە دانیشتووە و قایشی سەلامەتیی بەستووە، بۆیە زیانێکی زۆری پێنەگەیشتووە. بەپێی زانیارییەکان، ناوبراو بە پێی خۆی لە ئۆتۆمبێلەکە دابەزیوە و لە دۆخێکی شۆکدا بووە. لە ئێستادا بەمەبەستی لێکۆڵینەوە لەلایەن هێزە ئەمنییەکانەوە دەستگیرکراوە.