بەهۆی فێستیڤاڵی هەناری هەڵەبجە ڕۆژێک پشوو ڕاگەیێنرا

ئاڤا نیوز

 

بەبۆنەی فێستیڤاڵی هەنار و پایزی هەڵەبجە ڕۆژێک پشووی فەرمی لە پارێزگای هەڵەبجە ڕاگەیێنرا.

 

وێنە گەورەکە: سبەی پێنجشەممە 30-10-2025، فێستیڤاڵی هەنار و پایزەی هەڵەبجە دەست پێ دەکات و ماوەی سێ ڕۆژ بەردەوام دەبێت، 500 کەپر و کۆشک بۆ جووتیاران، باخەوانان و فرۆشیارانی سنوورەکە ئامادەکراون، بۆ ئەوەی بەرووبوومی کشتوکاڵی و ئاژەڵداران لە فێستیڤاڵەکەدا نمایش بکرێت.

 

لێدوانی فەرمی: نوخشە ناسیح پارێزگای هەڵەبجە گوتی: بەبۆنەی بەڕێوەچوونی "فێستیڤاڵی هەنار و پایزی هەڵەبجە" و بەمەبەستی كارئاسانی بۆ بەشداریكردنی بەرفراوانی فەرمانبەران و هاونیشتمانیان لەو بۆنە گرنگەدا، سبەی پێنجشەممە 30-10-2025، لە سەرجەم فەرمانگە و داودەزگا حكومییەكانی سنووری پارێزگای هەڵەبجە دەكرێتە پشووی فەرمی.

 

ئەوەی پێویستە بیزانیت؛ ئەم پشووە ناوەندەكانی خوێندنیش دەگرێتەوە، بەمەبەستی ڕەخساندنی دەرفەت بۆ قوتابییان و مامۆستایان، تا بەشداریی لەم چالاكییە كولتووری و ئابوورییە گرنگەی شارەكەیاندا بكەن.

 

لە لایەکی دیکەوە: لیژنەی ئەمنی پارێزگای هەڵەبجە ئەم ڕێنماییانەی بۆ فێستیڤاڵەکە دەرکردووە:

-   بردنەژوورەی چەک و چەقۆ قەدەغەیە.
-   بەکارهێنانی جگەرە، ڤەیپ و نێرگەلە بۆ کەسانی خوار 18 ساڵ قەدەغەیە.
-   بانگەشەی هەڵبژاردن و هەڵواسینی فلێکس و لۆگۆ قەدەغەیە.
-   بردنەژوورەوەی ماددە کحولییەکان بۆ هەموو تەمەنێک قەدەغەیە.
-  بردنەژوورەوەی ئۆتۆمبێل قەدەغەیە و پێویستە هەموو کەس بە پیادە بڕۆنە ژوورەوە.
-   پشکنین بۆ سەرجەم ئەو کەسانە دەکرێت کە دەچنە ژوورەوە.
-   یاری ئاگرین و تۆنتەرەوە بەهەموو شێوەیەک قەدەغەیە.
-  نابێت لە دەرەوەی شوێنی فێستیڤاڵ فرۆشیار هەبێت، بۆ ئەوەی ئاستەنگی هاتووچۆ دروست نەبێت.

 

گۆشەیەکی دیکەی دیمەنەکە: وەک ئامادەکاری بۆ فێستیڤاڵەکە دوو هۆتێل و یەک مۆتێل و 30 خانوو و شوقەی گەشتیاری مۆڵەتیان وەرگرتووە، 16 کابینەی گەشتیاری لە ئەحمەدئاوا و 24 کابینەی گەشتیاری لە هاوینەهەواری ئاوێسەر ئامادەکراون، 22 ڕێستۆرانت، هەشت خواردنگەی خێرا، 23 کافتریا، چوار کافێ لەلایەن بەڕێوەبەرایەتیی گەشتوگوزاری هەڵەبجەوە مۆڵەتیان پێدراوە و ئامادەن بۆ خزمەتکردنی گەشتیاران.

 

ئەمەش بزانە: فێستیڤاڵەکە چەندین بڕگەی دیکەی هونەری و کولتووری لەخۆدەگرێت، وەک کۆنسێرتی گۆرانی و پێشانگای فۆتۆگرافی و پێشبڕکێی گەورەترین هەنار.

 

بۆچی گرنگە: ئەم فێستیڤاڵە هاوکار دەبێت لە بەبازاڕکردنی بەرووبوومی جووتیاران و هەلی کاریش بۆ گەنجان دەڕەخسێنێت، هاوکات کاریگەری دەبێت لەسەر ناساندنی زیاتری ناوچە گەشتیارییەکانی سنووری پارێزگای هەڵەبجە.