لیژنەی لێکۆڵینەوەی نێودەوڵەتی بۆ سوەیدا: پێشێلکارییەکی زۆر کراوە

ئاڤا نیوز

لیژنەی لێکۆڵینەوەی نێودەوڵەتی تایبەت بە سووریا کۆتاییهاتنی دووەم سەردانی تیمی خۆی بۆ سوەیدا ڕاگەیاند و دووپاتیکردەوە کە "ڕێژەیەکی زۆر" پێشێلکاری و سەرپێچی لە پارێزگاکەدا تۆمار کردووە.

چیرۆکی سەرەکی: دوای گرژی و ئاڵۆزییەکانی پارێزگای سوەیدا لە سووریا، بەمەبەستی زانینی پێشێلکارییەکان، تیمی لیژنەی لێکۆڵینەوەی نێودەوڵەتی دووەم سەردانی بۆ ئەو پارێزگایە کرد.

ڕاگەیێنراوی فەرمی: لیژنەکە لە ڕاگەیێنراوێکدا ئاشکرای دەکات، گەڕی دووەمی خۆیان بۆ سوەیدا و کەمپی ئاوارەکان لە شارەکانی دیکەی سووریا کۆتایی پێهێناوە. لیژنەکە ڕایگەیاند، گوێیان لە شایەتحاڵیی "مەترسیدار"ـی خەڵکی ناوچەکە بووە سەبارەت بەو پێشێلکارییانەی کە دژی هاووڵاتیانی سڤیل ئەنجامدراون.

پێدراوە ڕاستییەكان: لیژنەکە ئاماژەی بەوەدا کە "زۆرێک لە کردارەکان بە شێوازێکی دڕندانە و نامرۆڤانە ئەنجامدراون."

زانیاریی زیاتر: لیژنەکە هەروەها ڕایگەیاند، کۆمەڵێک ڕاسپاردەی سەرەتایی زیادەی ئاراستەی لایەنە پەیوەندیدارەکان کردووە بۆ چارەسەرکردنی نیگەرانییە بەردەوامەکانی پەیوەست بە مافەکانی مرۆڤ، بەتایبەتی لە سایەی بەردەوامبوونی ئاوارەبوون و نزیکبوونەوەی وەرزی زستان.

لیژنەکە ئاماژە بۆ ئەوە دەکات قەبارەی پێشێلکاری و سەرپێچییەکان "زۆر گەورەن"، لێکۆڵینەوەکانمان هێشتا بەردەوامن.

باکگراوند: ناوەڕاستی مانگی تەمموزی ئەمساڵ ڕووبەڕووبوونەوەیەکی خوێناوی لەنێوان پێکهاتەی دروزەکان لە پارێزگای سوەیدا و هێزەکانی سەر بە حکومەتی سووریا ڕوویدا، لە ئەنجامیشدا زیاتر لە هەزار و 600 کەس کوژران و دەیان هەزار کەسیش ئاوارەبوون. تاوەکو ئێستا دۆخی شارەکە ئاسایی نەبووەتەوە، ناوە ناوە هێرشیان دەکرێتە سەر.