سه‌رۆك بارزانی: پێویسته‌ بۆ ده‌ستوور بگه‌ڕێینه‌وه‌ و دیكتاتۆریەت ڕەت دەكەینەوە

ئاڤا نیوز

سەرۆك بارزانی بە پێویستی دەزانێت هەمووان بۆ ده‌ستوور بگه‌ڕێنه‌وه‌ و ڕایدەگەیێنێت، "ئه‌گه‌ر ئه‌وان بڵێن نه‌ فیدراڵی و نه‌ ده‌ستوور و نه‌ هه‌رێم هه‌بێت، ئێمه‌ به‌ هه‌موو شێوه‌یه‌ك دیكتاتۆریه‌ت ڕه‌تده‌كه‌ینه‌وه‌."

چیرۆكی سەرەكی: ئێواره‌ی ڕۆژی چوارشه‌ممه‌ 29ـی تشرینی یەکەمی 2025، له‌ شاری دهۆك، سه‌رۆك مه‌سعود بارزانی، له‌گه‌ڵ به‌شێك له‌ چین و توێژه‌كانی نه‌ینه‌وا و شنگال كۆبووه‌وه‌ و وتارێكی پێشكه‌شی ئاماده‌بووان كرد.

پەیامی فەرمی: سەرۆك بارزانی لە وتارەكەیدا، ڕۆڵی پێشمەرگەی لە تێكشكاندنی داعش و ڕزگاركردنی ناوچەكانی نەینەوا و شنگالی بەبیر خەڵكی ئەو ناوچانە هێنایەوە و پێی وتن: "بینیتان چۆن پێشمه‌رگه‌ به‌رگری له‌ هه‌موو پێكهاته‌كان كرد و له‌ پێناو به‌رگریكردن له‌ به‌ها و ڕووحی هاووڵاتییان له‌ نه‌ینه‌وا و دهۆك و ته‌واوی ناوچه‌كانی دیكه،‌ گیانیان به‌خشی؛ پێشمه‌رگه‌ 12 هه‌زار شه‌هید و برینداری له‌ شه‌ڕی دژی داعش دا."

وتیشی، "سەبارەت بە ئێمه‌ نه‌ینه‌وا و شاری مووسڵ به‌ دانیشتووان و خاكه‌كه‌ی گرنگیی تایبه‌تیی هه‌یه‌ و ئه‌مه‌ درێژكراوه‌یه‌ بۆ هه‌رێمی كوردستان به‌ تایبه‌ت هه‌ردوو پارێزگای دهۆك و هه‌ولێر و به‌ پێچه‌وانه‌شه‌وه‌." هەروەها ئاماژه‌شی به‌ په‌یوه‌ندییه‌ مێژووییه‌كان كرد و له‌ ڕووی پێكه‌وه‌ژیان، نه‌ینه‌وای به‌ عێراقێكی بچووكراوه‌ وه‌سف كرد.

بەشێكی دیکە لە وتەكانی سەرۆك بارزانی:

٠ پێشمه‌رگه‌ 12 هه‌زار شه‌هید و برینداری له‌ شه‌ڕی دژی داعش دا.
٠ هه‌رێمی كوردستان په‌ناگه‌یه‌كی ئارام بوو بۆ هه‌موو هاووڵاتییان بێ جیاوازی.
٠ هەرێمی كوردستان هه‌ر به‌ په‌ناگه‌ بۆ هه‌موو هاووڵاتییه‌كی عێراقی بێ جیاوازی ده‌مێنێته‌وه‌.
٠ داعش تاوانی دڕندانه‌ی ئه‌نجامدا و زیانی به‌ دۆخه‌كه‌ و برایه‌تی و پێكه‌وه‌ژیان گه‌یاند، به‌ڵام به‌ هه‌وڵی دڵسۆزان له‌ هه‌موو ئایین و مه‌زهه‌به‌كان و نه‌ته‌وه‌كان ئه‌و كۆسته‌ تێپه‌ڕێنرا.
٠ ناكۆكی له‌گه‌ڵ ده‌سه‌ڵات شتێكه‌ و په‌یوه‌ندیی كۆمه‌ڵایه‌تی و په‌یوه‌ندیی گه‌ل شتێكی دیكه‌یه‌ و نابێت هیچ دۆخێك كاریگه‌ریی بكاته‌ سه‌ر ئه‌و په‌یوه‌ندییه‌ پیرۆزه‌.
٠ هیواخوازم ئه‌م هه‌ڵبژاردنه‌ ده‌رئه‌نجامێكی جیاوازی له‌چاو هه‌ڵبژاردنه‌كانی پێشوو لێبكه‌وێته‌وه‌ و هاوكار بێت بۆ ئه‌وه‌ی پڕۆسه‌ی سیاسی بگه‌ڕێته‌وه‌ سه‌ر ڕاسته‌ڕێی خۆی و بگه‌ڕێته‌وه‌ بۆ پابه‌ندبوون به‌ ده‌ستوور و پابه‌ندبوون به‌ هه‌رسێ بنه‌مای: هاوبه‌شی و هاوسه‌نگی و سازان.
٠ ده‌ستوور ماف و ئه‌ركه‌كانی دیاریكردووه‌ و به‌شی ئه‌وه‌ی تێدایه‌ كه‌ پشتگیریی ئه‌م ده‌ستووره‌ بكه‌ین و شانازیی پێوه‌بكه‌ین .
٠ پێویسته‌ بۆ ده‌ستوور بگه‌ڕێینه‌وه‌ و ئه‌گه‌ر ئه‌وان بڵێن نه‌ فیدراڵی و نه‌ ده‌ستوور و نه‌ هه‌رێم هه‌بێت، ئێمه‌ به‌ هه‌موو شێوه‌یه‌ك دیكتاتۆریه‌ت ڕه‌ت ده‌كه‌ینه‌وه‌.
٠ كاندیدانی پارتیم ڕاسپاردووه‌ هه‌ر نوێنه‌ری هه‌رێمی كوردستان نه‌بن، به‌ڵكو نوێنه‌رایه‌تیی هه‌موو عێراق و پێكهاته‌كان بكه‌ن.
٠ هیچ رۆژێك و هیچ جارێك په‌نامان بۆ هیچ كرده‌وه‌یه‌ك نه‌برد كه‌ هاووڵاتیی عێراق ئازار بدات له‌ هیچ شارێكی عێراقی له‌ باشووری عێراق تا باكوور.
٠ده‌نگ به‌و لایه‌نه‌ و به‌و كه‌سه‌ بده‌ن كه‌ خزمه‌تتان ده‌كات و وای ده‌بینن كه‌ ده‌توانێت به‌رگری له‌ مافه‌كانتان بكات، ئه‌مه‌ بۆ ئێوه‌ جێهێڵدراوه‌ و ئازادیی ته‌واوتان هه‌یه‌.
٠ گوێ ناده‌ینه‌ هەندێك له‌و كه‌سانه‌ی كه‌ هه‌ڕه‌شه‌یان كردووه‌ و ئه‌مه‌ تای هه‌ڵبژاردنه‌ و هیچ نرخێكیان نییه‌.
٠ ئەوانەی هەڕەشە دەكەن، نوێنه‌رایه‌تیی ڕای هاووڵاتییان ناكه‌ن به‌ تایبه‌ت ڕای شه‌قامی عه‌ره‌بی.