لێدوانەکانی ئەحمەد شەرع لەبارەی عێراق و میسر کاردانەوەی زۆری لێدەکەوێتەوە

ئاڤا نیوز

لێدوانەکانی سەرۆککۆماری سووریا، لەبارەی عێراق و میسر مشتومڕێکی گەورەی لە تۆڕە کۆمەڵایەتییەکاندا لێکەوتووەتەوە، ئەمەش دوای ئەوەی سعوودیە، ئیمارات و قەتەری بە وڵاتانی "سەرکەوتوو" ناوبرد و تەنیا ستایشی هەوڵەکانی ئەم وڵاتانەی کرد.

چیرۆکی سەرەکی: ئەحمەد شەرع، سەرۆککۆماری سووریا لە چوارچێوەی کۆنفرانسی "دەستپێشخەریی داهاتووی وەبەرهێنان 2025" لە ڕیازی پایتەختی سعوودیە، لە بەشێکی قسەکانی باسی پەیوەندییەکانی وڵاتەکەی لەگەڵ وڵاتانی عەرەبی کرد.

لێدوانی فەرمی: شەرع ڕایگەیاند. "ئێمە (لە سووریا) چەندین سوود و تایبەتمەندی زۆرمان هەیە، ئەگەر ئەمە لەگەڵ دیدگای (دیدگای سعوودیە 2030) یەک بگرێتەوە، ئەوا جۆرێک لە تەواوکاری ڕوودەدات. سووریا ئێستا پەیوەندییەکی نموونەیی لەگەڵ تورکیا و پەیوەندییەکی نموونەیی لەگەڵ سعوودیە، هەروەها لەگەڵ قەتەر و ئیمارات هەیە، ئەم وڵاتانە بە بڕوای من وڵاتانی سەرکەوتوون، لەگەڵ ڕێزم بۆ وڵاتانی دیکە."

لەهەمان کاتدا: سەرۆککۆماری سووریا گوتی: "وڵاتانی وەک میسر و عێراق و وڵاتانی دیکەش سەرکەوتنیان هەیە، بەڵام ئەم وڵاتانە (سعوودیە، ئیمارات، قەتەر) بە هەوڵی دوو هێندە و خێراییەکی زۆرەوە کار دەکەن و هاوشانی گەشەسەندنەکانی جیهانن، لە بواری پێشکەوتنی تەکنیکی و تەکنۆلۆژی و هتد." 

کاریگەریی و لێکەوتەکان: ئەم لێدوانانەی ئەحمەد شەرع، سەرۆککۆماری سووریا بە خێرایی لە تۆڕە کۆمەڵایەتییەکاندا بڵاوبوونەوە و کاردانەوەی جیاوازیان لێکەوتەوە، هەندێک بە ستایش و هەندێکیش بە ڕەخنە ناویان برد.