ئاڤای خەڵک؛ لە سلێمانی داوای دانانی پردێکی پەڕینەوە دەکرێت

ئاڤا نیوز

هاووڵاتییانی سلێمانی چەندین جار داوای پردی پەڕینەوەیان کردووە بۆ دووربوونیان لە کارەساتی دڵتەزێن بەڵام تاوەکوو ئێستا وەڵام نەدراونەتەوە. 

بەدواداچوونی ئاڤا: لە سەرەتای شەقامی سالم، لە دووڕیانی سەرچنارەوە تاوەکو بەردەم بەڕێوەبەرایەتیی پەروەردە، شەقامێکی قەرەباڵغە و هاتووچۆیەکی زۆری لەسەرە، خەڵکێکی زۆریش بە پیادە لە شەقامەکە دەپەڕنەوە و بەهۆیەوە چەند جارێک هاووڵاتییان سەیارە لێی داون و ڕووداوی هاتووچۆ دروست بووە، ئێستا بۆ چارەسەری ئەو کێشەیە هاووڵاتییان داوای دانانی پردێکی پەڕینەوەی پیادە دەکەن.

لێدوانی فەرمی: کامەران عەزیز، لەبەشی بەدواداچونی پارێزگاری سلێمانی، بۆ ئەم داواکارییە دەڵێت، دروسکردنی پردی پەرینەوە تێچوویەکی زۆری هەیە، لەتوانای بودجەی پارێزگای سلێماندا نییە، بۆیە دەکرێت داواکارییەکەمان بە نووسراو بۆ بهێنن و ئێمەش بەرزی دەکەینەوە بۆ ئەنجوومەنی وەزیران.

زانیاریی تایبەت: سەرچاوەیەک لە ئەنجوومەنی وەزیرانیش لەوبارەیەوە بە ئاڤای ڕاگەیاند: ئە جۆرە پرۆژانە پێویست ناکات بۆ ئێمە بنێردرێت، پڕۆژەیەکی ستراتیژی نییە تاوەکو تێچووی زۆربێت، پارێزگای سلێمانی دەتوانێت لەڕێگەی ئەندازەی هاتووچۆ خەمڵاندنی بۆ بکات و لەسەر بودجەی خۆیان جێبەجێی بکەن.