نەتەوەیەکگرتووەکان: زیاتر لە 400 هەزار سووری بەهۆی تووندوتیژیی تائیفییەوە ئاوارە بوون

ئاڤا نیوز

 

نەتەوەیەکگرتووەکان ڕایدەگەیێنێت، لە ماوەی یەک ساڵی دوای کۆتاییهاتنی جەنگ لە سووریا، زیاتر لە 400 هەزار سووری بەهۆی تووندوتیژیی تائیفی، تۆڵەسەندنەوە و ناکۆکی لەسەر موڵکایەتی، ماڵەکانیان جێهێشتووە.

 

بڵاوکراوەی فەرمی: نەتەوەیەکگرتووەکان دووپاتی کردەوە کە قۆناغی گواستنەوەی سەخت بەرەو سەرکردایەتییەکی نوێ لە سووریا، شەپۆلی نوێی ئاوارەبوونی بەدوای خۆیدا هێناوە. ئەمەش بەهۆی تۆڵەسەندنەوە، تووندوتیژیی تایفی، ناکۆکیی دێرینی موڵکایەتی و داگیرکردنی زەوییەکانی باشووری سووریا لەلایەن ئیسرائیلەوە.

 

ژمارەکان وادەڵێن: بەگوێرەی نەتەوەیەکگرتووەکان لە نێوان کانوونی یەکەمی 2024 و تەممووزی 2025، زیاتر لە 430 هەزار کەس لە سووریا ئاوارە بوون. هیچ کۆمەڵگەیەکی ئایینی یان نەتەوەیی لەم گێژاوانە بێبەش نەبووە.

 

پێدراوە ڕاستییەکان: زۆرترین کەس لە پارێزگای سوەیدا ئاوارە بوونە، کە لە هاویندا پێکدادانی خوێناوی تێدا ڕووی دا. بەپێی تۆری مافی مرۆڤی سووریا، زیاتر لە 1300 کەس لەو تووندوتیژییانەدا کوژراون، نزیکەی 400 یان هاووڵاتی سڤیل بوونە و زۆربەیان لە دروزەکان بوون.

 

لەلایەکی دیکەوە: هەر بەگوێرەی ڕاپۆرتەکەی نەتەوەیەکگرتووەکان، شەپۆلی تووندوتیژیی دیکە، کە هاوشێوەی سوەیدا بوون و زۆربەیان بەهۆی گرژییە تائیفییەکانەوە بوون، دەیان هەزار سووریایان ناچار کردووە ماڵەکانیان جێبهێڵن.

 

ئەوەی لەوبارەیەوە دەگوترێت: ئاژانسی نەتەوەیەکگرتووەکان بۆ کاروباری پەنابەران دەڵێت، زیاتر لە 12 ملیۆن کەس لە 23 ملیۆن دانیشتووانی پێش جەنگی سووریا، یان لەناوخۆ یان لە دەرەوە ئاوارە بوون. دوای ڕووخانی ڕژێمەکەی ئەسەدیش، لانیکەم 2.8 ملیۆن کەس گەڕاونەتەوە.