دیزاینی یاریگایەکی نوێ و گەورەتر بۆ یانەی زاخۆ دەخرێتەڕوو

ئاڤا نیوز

 

كارگێڕیی یانەی وەزرشیی زاخۆ بەهەماهەنگی لەگەڵ ئیدارەی سەربەخۆی زاخۆ، پرۆژەیەكی پێشنیاز كردووە بۆ دروستكردنی یاریگایەکی نوێی نێودەوڵەتی بۆ یانەی زاخۆ كە شوێنی دانیشتنی بۆ 40 هەزار كەس هەیە، ئێستا كار بۆ وەرگرتنی ڕەزامەندی لەسەر دروستكردنی یاریگەكە دەكرێت.

 

بڵاوكراوەی فەرمی: پێگەی فەرمیی یانەی وەزرشیی زاخۆ، دیزاینی پێشنیازكراوی یاریگاكەی بڵاوكردووەتەوە كە لەسەر شێوازی ئۆڵۆمپی دروست دەكرێت و جگە لە چیمەنی یاریگەی تۆپی پێ، تارتانی ڕاكردنی لەخۆگرتووە و لە هەشت تراك (بازنەی ڕاكردن) پێكهاتووە.

 

زانیاریی زیاتر: درێژی چیمەنی یاریگاكە 105 مەتر دەبێت و پانیەكەشی 68 مەترە، 30 دەروازەی چوونەژوورەوە و هاتنەدەرەوەی لەخۆگرتووە، بەرزترین كوالێتی كەرەستە و چیمەنی سەردەمیانە لە دروستكردنی یاریگاكە بەكاردەهێنرێت.

 

بۆچی گرنگە: ئێستا زاخۆ بە یەكێك لە بەهێزترین تیپەكانی تۆپی پێی عێراق دادەنرێت و یانەكە هەوادارێكی زۆری لە سەرانسەریی كوردستاندا هەیە. بەتەواوبوونی یاریگاكە، ژمارەیەكی زۆرتری هەوادارانی یانە سوورپۆشەكەی پردی دەلال دەتوانن لەكاتی یارییەكانی یانەكە ئامادە بن، بەوپێیەی یاریگاكەی ئێستای، شوێنی دانیشتنی بۆ 25 هەزار هاندەر هەیە.