ئەردۆغان و شاندی دەم پارتی لەبارەی پرۆسەی ئاشتی کۆبوونەوە

ئاڤا نیوز

ئێوارەی ئەمڕۆ، کۆبوونەوەی ڕەجەب تەیب ئەردۆ‌غان، سەرۆککۆماری تورکیا و پەروین بوڵدان و میدحەت سانجار، ئەندامانی شاندی ئیمراڵی لە کۆشکی کۆماری لە ئەنقەرە دەستیپێکرد.

زانیاریی بەدەستهاتوو: کەناڵی سی ئێن ئێن تورک بڵاوی کردووەتەوە، ئێوارەی ئەمڕۆ پێنجشەممە، 30-10-2025، ڕەجەب تەیب ئەردۆغان، سەرۆککۆماری تورکیا پێشوازی کرد لە هەریەک لە پەروین بوڵدان و میدحەت سانجار، ئەندامانی شاندی ئیمراڵی. هەریەک لە ئەفگان ئالا، جێگری سەرۆکی گشتیی ئاکپارتی و ئیبراهیم کاڵن، سەرۆکی دەزگای هەواڵگریی تورکیا ئامادەی کۆبوونەوەکەن.

ڕاگەیێنراوی فەرمی: دوای کۆبوونەوەکە دەم پارتی ڕاگەیێنراوێکی بڵاوکردەوە و تێیدا هاتووە، لە کۆبوونەوەکەدا تاوتوێی دوایین قۆناغی پەیوەندیدار بە پرۆسەی ئاشتی و کۆمەڵگەی دیموکرات و قۆناغی داهاتووی پرۆسەکە کراوە.

بەتەنیشت ئەم بابەتەوە: بەر لە کۆبوونەوەکە پەروین بوڵدان ئاماژەی بەوەدا تورکیا بە قۆناغێکی گرنگی مێژوویدا تێدەپەڕێت و وتی: لەگەڵ ئەردۆغان تاوتوێی دوایین پێشهاتەکانی پەیوەندیدار بە پرۆسەی ئاشتی و هەڵگرتنی بەربەستەکانی بەردەم پرۆسەکە دەکەین.

ئەوەی پێویستە بیزانیت: هەرچەند بڕیار بوو دوو ڕۆژ لەمەوبەر کۆبوونەوەکە ئەنجام بدرێت، بەڵام بۆ ئەمڕۆ دواخرا. ئەمە سێیەم کۆبوونەوەی ئەردۆغان و شاندی ئیمراڵییە و پێشتریش لە 10ـی نیسان و 7ـی تەمووز کۆببوونەوە.

لەلایەکی دیکەوە: هەر ئەمڕۆ بە بەشداری وەزیرانی دەرەوە و دادی تورکیا 16ـیەمین کۆبوونەوەی ئەوە کۆمیسیۆنە دەستیپێکردووە کە بە مەبەستی ڕەخساندنی زەمینەسازیی یاسایی بۆ پرۆسەکە لە 1-8-2025 لە پەرلەمانی تورکیا پێک هێنراوە.