سەرۆك بارزانی: بنەماکانی هاوبەشی، هاوسەنگی و سازان جێبەجێ نەکراون

ئاڤا نیوز

سەرۆک بارزانی لە کۆبوونەوەی لەگەڵ کەسایەتی و ڕیشسپییانی دهۆک و سێمێل تیشک دەخاتە سەر هەموو ئەو هەڵبژاردنانەی کە لە دوای ساڵی 1992 لە هەرێمی کوردستان کراون و دەڵێت، پارتی لە هەموو هەڵبژاردنەکاندا هەر یەکەم بووە.

چیرۆکی سەرەکی: دوای نیوەرۆی ئەمڕۆ پێنجشەممە 30-10-2025 لە شاری دهۆك، سەرۆك مەسعود بارزانی لەگەڵ کەسایەتی و ڕیشسپییەکانی دهۆك و سێمێل کۆبووەوە. تێیدا باسی لە چەند پرس و بابەتێکی گرنگی تایبەت بە عێراق و هەرێمی کووردستان کرد.

ڕاگەیێنراوی فەرمی: بارەگای بارزانی ڕایگەیاند، سەرۆک بارزانی لە وتارەکەی بۆ کەسایەتی و ڕیشسپییەکانی دهۆک و سێمێل دووپاتی کردەوە، لە هەموو ئەو هەڵبژاردنانەی کە لە دوای ساڵی 1992 لە هەرێمی کوردستان کراون، پارتی یەکەم بووە، ئەویش لەبەرئەوەی دەنگی گەل سەبارەت بە پارتییەوە بابەتێكی مەبدەئییە و باوەڕی بە دەنگی خەڵك هەیە.

سەرۆک بارزانی تیشکی خستە سەر ئەوەی کە عێراقی دوای 2003 لەسەر بنەماکانی "هاوبەشی، هاوسەنگی و سازان" دامەزراوە، بەڵام ئەم بنەمایانە جێبەجێ نەکران و دەستوور پێشێل کرا و ئەگەر دەستوور جێبەجێ کرابا، ئەو کێشانەی ئێستا هەن ڕوویان نەدەدا.

لەلایەکی دیکەوە: سەرۆک بارزانی ئاماژە بە پەیوەندییەکانی هەولێر و بەغدا دەکات و دەڵێت، بەغدا لەسەر سیاسەتی زوڵمکردن بەردەوامە و بە ناوی موچەبڕین هەمان سیاسەت پەیڕەو دەکات کە لە ئەنفال و کیمیاباران کەمتر نیە، بەڵام "دڵنیاتان دەکەینەوە کەس ناتوانێت نە بە مووچە و نەبە هیچ شتێكی دیکە ئیرادەی ئێمە بشکێنێت و خۆی لەسەر ئێمە فەرز بکات".

بەشێکی دیکە لە وتەکانی سەرۆک بارزانی:

٠ نابێت عێراق بە دەستی هیچ لایەنێكەوە بە ناوی زۆرینە بێت، دەبێت عێراق بۆ هەمووان بێت و هەر کەس پێگە و مافی خۆی لەو وڵاتەدا هەبێت.

٠ سەرەڕای ئەوەی ڕژێم جینۆسایدی گەلی کوردی کرد، بەڵام لە کاتی ڕاپەڕینی ساڵی 1991 کە دوو فەیلەقی سوپای عێراق کەوتبوونە دەستی خەڵك، هیچ سەربازێكیان نەکوژران و ئازار نەدران، بە پێچەوانەوە خزمەت کران و ڕەوانەی ناوچەکانی خۆیان کرانەوە.

٠ ئەگەر ئێمە یەكگرتوو و یەكڕیز و تەبا بین هیچ هێزێك بەسەرمان سەرناکەوێت، ئەو کێشانەی کە ئێستا ڕووبەڕووی ئێمە دەبنەوە هەمووی دەرئەنجامی نەبوونی یەكڕیزییە.

٠ سەرباری ئەوەی کورد لە سەردەمی ڕژێمە یەك لە دوای یەکەکانی عێراق ئەنفال و جینۆساید کراوە، کورد هێشتا ئاشتیخوازە و هەر دژی شەڕ و تووندوتیژییە، بەڵام ئەگەر شەڕمان پێ بفرۆشن، هەرگیز ستەم و سەرشۆڕی قبووڵ ناکەین و تەسلیمی زاڵم و دیکتاتۆر نابین".

٠ پاراستنی فەرهەنگی پێكەوەژیان لە کوردستان پێویستە و نابێت بکەوێتە ژێر کاریگەریی ناکۆکیی لایەنە سیاسییەکان.

٠ دەستکەوت و پرۆژە ستراتیژییەکانی حکومەتی هەرێمی کوردستان گرنگی زۆریان بۆ ئێستا و داهاتووی کوردستان هەیە.

٠ وڵات و خاکێکی دەوڵەمەندمان هەیە، هەروەها بەدیلی بەهێزتر لە نەوت هەیە کە کشتوکاڵ و گەشتوگوزار و پیشەسازییە.

٠ پڕۆژەکانی ئاو و دروستکردنی پۆند و بەنداوەکان سوودی زۆریان بۆ هەرێمی کوردستان لە ڕووی گلدانەوە و پاراستنی ئاو بۆ داهاتووی هەرێمی کوردستان هەیە.