ئەنجوومەنی باڵای فەتوا بۆ ئاڤا: کڕین و فرۆشتن بە کارتی دەنگدان حەرامە

ئاڤا نیوز

وتەبێژی یەکێتی زانایانی کوردستان لەبارەی مامەڵەكردن بە كارتی دەنگدانەوە، تایبەت بۆ ئاڤا ڕایگەیاند، ئەنجوومەنی باڵای فەتوا كڕین و فرۆشتن بە كارتی دەنگدان بە حەرام دەزانێت و ئەو پارەیەشی كە لەو ڕێگەوە دەستدەكەوێت، حەرامە.

وێنە گەورەكە: لەماوەی ڕابردوودا، لە پارێزگاكانی ناوەڕاست و خوارووی عێراق باسوخواسی كڕینی كارتەكانی دەنگدان بۆ پرۆسەی هەڵبژاردن لەلایەن چەند كاندیدێكەوە بڵاوبووەوە، هاوكات دەنگۆی ئەوە هەبوو لە هەرێمی كوردستانیش كاری لەمجۆرە كرابێت.

لێدوانی فەرمی: د. عەبدوڵڵا شێركاوەیی، وتەبێژی یەکێتی زانایانی ئایینی ئیسلامی كوردستان بە ئاڤای وت، ئەنجوومەنی باڵای فەتوا لە دانیشتنی ئاسایی خۆیدا، فەتوایێکی تایبەتی لەسەر ئەم پرسە دەرکرد و تێیدا کڕین و فرۆشتنی کارتی دەنگدان بە حەرام دەزانێت و ئەو پارەیەشی کە لەو ڕێگەیەوە بەدەست دەکەوێت حەرامە.

زانیاریی زیاتر: وتەبێژی یەکێتی زانایان وتیشی، ئەنجوومەنی باڵای فەتوا لە فەتواکەیدا سێ خاڵی ڕوونکردووەتەوە کە تێیدا ئاماژە بە حەرامی ئەو کارانە دەکات:

یەکەم: دەنگدان ئەمانەتێکە لە ئەستۆی هاووڵاتیان و فرۆشتنی کارتی دەنگدان خیانەتە لە گەل و وڵات.

دووەم: خراپ بەکارهێنانی مافێکی شەرعی و یاساییە و هۆکارە بۆ تەزویر و ساختەکردن و گەیشتنی کەسانی ناشایستە بۆ پەرلەمان.

سێیەم: فرۆشتنی کارتی دەنگدان لە ڕووی یاساییەوە پێچەوانەی یاسایی هەڵبژاردنە.